ހދ އަތޮޅު ތައުލީމީ މަރުކަޒުގެ ޔުނިފޯމް ބަދަލުކުރީ މިނިސްޓްރީގެ ހުއްދަނެތި

ހދ އަތޮޅު ތައުލީމީ މަރުކަޒުގެ ރަސްމީ ޔުނިފޯމް ބަދަލުކޮށް، އާ ޔުނިފޯމެއް އިފްތިތާހްކޮށް ޔުނިފޯމް ފެހުމަށް ބެެލެނިވެރިންނަށް ސްކޫލުން އަންގާފައިވަނީ އެޑިއުކޭޝަން މިނިސްޓްރީގެ ހުއްދަ ނެތި ކަމަށް އެ މިނިސްޓްރީން ބުނެފި އެވެ.

ކުޅުދުއްފުށީ އޮންލައިނުން ” ކުރި ސުވާލަކަށް ޖަވާބުދެއްވަމުން އެޑިއުކޭޝަން މިނިސްޓްރީގެ މީޑިއާ އޮފިޝަލަކު ވިދާޅުވީ އަންނަ އަހަރަށް އެސްކޫލްގެ އާ ޔުނީފޯމެއް ތައާރަފުކޮށް އެ ޔުނިފޯމް ފެހުމަށް ބެލެނިވެރިންނަށް ސްކޫލުން ހަވާލުކޮށްފައިވަނީ މިނިސްޓްރީއަށް އެންގުމެއް ނެތި، ހުއްދަނުނަގައި ކަމަށެވެ.

އަދި އެކަން މިނިސްޓްރީއަށް އެނގުނުއިރު ގިނަ ބެލެނިވެރިން ވަނީ އާ ޔުނީފޯމް ފެހުމުގެ މަސައްކަތް ފަށާފައި ކަމަށާއި އެެހެންކަމުން އެމައްސަލަ ބަލައި މިހާރުވަނީ އެޑިއުކޭޝަނުް ފާސްކޮށް 2016 ވަނަ އަހަރު އެ ޔުނީފޯމް ބޭނުން ކުރުމަށް  ހުއްދަދީފައި ކަމަށެވެ. އަދި އެކަން އެގޮތަށް ހަމަޖެއްސީ ބެލެނިވެރިންނަށް އިތުރު ބުރައެއް ނުޖެއްސުމަށް ކަމަށް އޭނާ ވިދާޅުވި އެވެ.

އެގޮތުން ޔުނީޕޯމް ގެ މައްސަލަ މިހާރު އެއްކޮށް ހައްލުވެފައިވާ ކަމަށް ވެސްއޭނާ ވިދާޅުވި އެވެ.

އޭނާ ވިދާޅުވީ އެކަން އެހެން ހިނގިއިރު ސްކޫލު ހިންގެވުމާ ހަވާލުވެހުންނެވި ޑެޕިއުޓީ ޕްރިންސިޕަލް އަހުމަދު އަބުދުﷲ އަށް އެޑިއުކޭޝަން މިނިސްޓްރީއަށް ހާޒިރުވާން އަންގާފައިވާ ކަމަށެވެ.

އޭނާ އެޑިއުކޭޝަން މިނިސްޓްރީއަށް ހާޒިރުކުރަނީ ޔުނީޕޯމް މައްސަލައިގެ އިތުރުން އެސްކޫލްގައި ބާ ހޯލްގައި ކުލާސް ރޫމްތަކެއް ހެދުމަށް މިނިސްޓްރީން އެންގުމުން އެކަމާދެކޮޅުހަދާފައިވާތީ ކަމަށެވެ.

“އެޑިއުކޭޝަންގެ ހުއްދައެއް ނެތި އެހާ ބޮޑު ސްކޫލަކާ ގުޅުން ހުރި ކަމެއް އެފަދަ ބޮޑު ނިންމުމެއް ސްކޫލް ހިންގުމާ ހަވާލުވެ ހުންނެވި ފަރާތުން ނިންމުމާ ގުޅިގެން އެމައްސަލަ ބެލުމަށް މާދަމާ އެބޭފުޅާ އެޑިއުކޭޝަނަށް ހާޒިރު ކުރާނެ”އޮފިޝަލް ވިދާޅުވި އެވެ.

މިމައްސަލާގައި އަހުމަދު އަބުދުﷲ ވިދާޅުވީ މިވަގުތު އޭނާ ހުންނެވީ އެޑިއުކޭޝަން މިނިސްޓްރީގެ އެންގުމަކަށް މާލެ އައިސްފަ ކަމަށާއި އެކަމާ ބެހޭގޮތުން ވަކި އެއްޗެއް ވިދާޅުވާން އެންގޭނީ މާދަމާ މިނިސްޓްރީން އޭނާއާ ބައްދަލުކޮށް ދަންނަވާ އެއްޗަކަށް ފަހު ކަމަށެވެ.

“ކުޅުދުއްފުށި އޮންލައިނާ” ވާހަކަ ދެއްކި އެސްކޫލުގެ ބައެއް ސީނިއާ ޓީޗަރުން ވިދާޅުވެފައިވަނީ ޔުނިފޯމް ތައާރަފްކުރަން ވެގެން މިނިސްޓްރީގެ ހުއްދައަށް ލިޔުމުން ހުށަހެޅިކަމަށާއި ޔުނިފޯމް ތައާރަފްކުރީ މިނިސްޓްރީން ހުއްދަ ނުދިނުމުން ކަމަށެވެ.  އަދި ސަރުކާރުން މާލޭގައި ހިންގާ ސްކޫލުތަކުގެ ޔުނިފޯމް ބަދަލުކުރެވޭއިރު އެސްކޫލުގެ ޔުނިފޯމް ބަދަލުކުރަން ހުއްދަ ނުލިބުމަކީ ސުވާލު އުފެދޭ ކަމެއް ކަމަށެވެ.

މިވަގުތު ހދ އޭއީސީ ހިނގުން ވަނީ ވަގުތީގޮތުން ޖަލާލުއްދީން ސްކޫލްގެ ޕްރިންސިޕަލް މަހުދީ ޝާހިދުއާ ހަވާލުކޮށްފަ އެވެ. ނަމަވެސް މަހުދީ މިހާރު ޗުއްޓީގައި ހުންނެވުމުން ސްކޫލުގެ ހިންގުން ހަވާލުކޮށްފައިވަނީ ޖަލާލުއްދީން ސްކޫލުގެ ލީޑިން ޓީޗަރު އައިމިނަތު މުހައްމަދާ އެވެ..އެޑިއުކޭޝަނުން ވަނީ މިދިޔަ މަހު އެސްކޫލަށް ޕްރިންސިޕަލެއް ހޯދުމަށް އިއުލާން ކޮށްފަ އެވެ،