ކުޑަ ކުއްޖަކަށް ޖިންސީ ގޯނާ ކުރިކަމުގެ ތުހުމަތުގައި ކުޅުދުއްފުށިން މީހަކު ހައްޔަރުކޮށްފި

9 އަހަރުގެ ކުޑަ އަންހެން ކުއްޖަކަށް ޖިންސީ ގޯނާ ކުރިކަމުގެ ތުހުމަތުގައި ކުޅުދުއްފުށިން މީހަކު ހައްޔަރުކޮށްފި އެވެ.

30 ނޮވެމްބަރ ވަނަ ދުވަހު ކޯޓު އަމުރެއްގެ ދަށުން މި މައްސަލާގައި ހައްޔަރުކޮށްފައިވީ 57 އަހަރުގެ ފިރިހެނެކެވެ.

އިތުބާރު ކުރެވޭ މަޤާމެއްގައި ހުރެ ތަފާތު އެކި ދުވަސްތައް މަތިން ކުޑަ އަންހެން ކުއްޖަށް ޖިންސީ ގޯނާކުރިކަމަށް ކުޅުދުއްފުށި ޕޮލިސް ސްޓޭޝަނަށް ހުށަހެޅުނު މައްސަލައަކާއި ގުޅިގެން މިމީހާ ފުލުހުންގެ ބެލުމުގެ ދަށަށް ގެނެސްފައިވަނީ  2015 ނޮވެމްބަރ 30 ވަނަ ދުވަހުގެ 09:48 ހާއިރު އެެވެ.

ހދ.ކުޅުދުއްފުށި މެޖިސްޓްރޭޓް ކޯޓުން ވަނީ މިނިސްޓްރީ އޮފް ހޯމް އެފެއާޒުން ކަނޑައަޅާތަނެއްގައި ބަންދުގައި ބަހައްޓައިގެން ކުރިއަށް ގެންދިޔުމަށް އެމީހާގެ ބަންދަށް 15 ދުވަހުގެ މުއްދަތު ދީފައެވެ.

މި މައްސަލަ މިހާރުދަނީ ކުޅުދުއްފުށީ ޕޮލިސްޓޭޝަނުން ތަހުގީގު ކުރަމުންނެވެ.