ހދ އަތޮޅު ކައުންސިލްތައް ހަރުދަނާ ކުރުމަށް މަސައްކަތު ބައްދަލުވުމެއް ބާއްވަނީ

ހދ އަތޮޅު ކައުންސިލްތަކުގެ ހިންގުން ހަރުދަނާ ކުރުމަށް “ރައްޔިތުންގެ ބައިވެރިވުމާއިއެކު، ދެމެހެއްޓެނިިވި ތަރައްގީއަށް ރޭވުން” މިނަމުގައި 3 ދުވަހުގެ މަސައްކަތު ބައްދަލުވުމެއް ބޭއްވުމަށް އަތޮޅު ކައުންސިލުން ހަމަޖައްސައިފިއެވެ.

މި ޑިސެންބަރު 17 ން 19 އަށް ހިންގުމަށް ހަމަޖެހިފައިވަ މި ބައްދަލުވުމުގައި ސެޝަންތައް ނަންގަވައިދެއްވާނީ ދާއިރާގެ ތަޖުރިބާ ލިބިވަޑައިގެންފައިވާ ބޭފުޅުންނެވެ.

ކުޅުުދުއްފުށީގައި ބޭއްވުމަށް ހަމަޖެހިފައިވާ މި ބައްދަލުވުމުގައި އަތޮޅުގެ ހުރިހާ ކައުންސިލްތަކުގެ ރައީސުންނާއި ޒިންމާދާރުވެރިންނާއި ކޮންމެ ކައުންސިލަކުންވެސް އިތުރު މެމްބަރަކު ބައިވެރިވުމަށް ހަމަޖެހިފައިވާއިރު މި ބައްދަލުވުމުގައި މައުލޫމާތު ދެވިގެންދާނީ ދެމެހެއްޓެނިވި ތަރައްގީއަށް ކުރިމަގު ބައްޓަން ކުރާނެ ގޮތާއި، ލީޑަރޝިޕް ސިފަތަކާއި، އެއްބައިވަންތަ ބައެއްގެ ގޮތުގައި މަސައްކަތް ކުރާނެގޮތުގެ އިތުރުން 2016 ވަނަ އަހަރު ހދ. އަތޮޅު ކައުންސިލުން ކުރިއަށް ގެންދާނެ ކަންތައްތަކާބެހޭ ގޮތުން ރަށު ކައުންސިލްތަކާއެކު މި ބައްދަލުވުމުގައި މަޝްވަރާ ކުރެވިގެން ދާނެއެވެ.

މިއަހަރުގެ ޖެނުއަރީ މަހު 13 ން 14 އަށް ވެސް ވަނީ ކައުންސިލްތަކާއެކު ބައްދަލުވުމެއް ބާއްވާފައެވެ. މިބައްދަލުވުމުގައި، އިދާރީ ކަންކަމުގައި ކައުންސިލުތަކުން އަމަލުކުރާނެ އުސޫލެއް ވަނީ ފާސްކޮށްފައެވެ.