ބޮޑު ސަރަހައްދެއް ސާފުކޮށް ގިނަ އަދަދެއްގެ ކުނި ނަގައިފި

Dec 13, 2015

ކުޅުދުއްފުށީގެ ވެލިގަނޑު ސަރަހައްދުގެ ބޮޑުބައެއް ސާފުކޮށް ގިނަ އަދަދެއްގެ ކުނި ނަގައިފި އެވެ.

ތިމާވެށި ހިމާޔަތް ކުރުމަށް މަސައްކަތް ކުރާ “ބިލީފް” ގްރޫޕުން “ކޮމިއުނިޓީ ކްލީންއަޕް”ގެ ނަމުގައި ކުރިއަށް ގެންދިޔަ މި ހަރަކާތުގައި ކުޅުދުއްފުށީ ހިއްކި ސަރަހައްދުގެ ބޮޑު ބައެއް ވަނީ ސާފުކޮށްފަ އެވެ.

ބިލީފުން މައުލޫމާތު ދިން ގޮތުގައި މި ސަރަހައްދުން ވަނީ 30 ހަށްވުރެ ގިނަ އަދަދެއްގެ ޑަސްބިން ކޮތަޅުގެ ކުނި އުކާލާފައެވެ.

އާންމުކޮށް ހުޅުވާލައިގެން އިއްޔެ ހަވީރު ކުރިއައްދިޔަ މިހަރަކާތުގައި އެންމެ ގިނަ އަދަދަކަށް އެ ސަރަހައްދުން ނަގާފައި ވަނީ ޕްލާސްޓިކްގެ ބާވަތްތައް ކަމަށް ބިލީފް އިން ބުނެއެވެ.

އެގޮތުން 16 ޑަސްބިން ކޮތަޅުގެ ޕްލާސްޓިކް ކުނި ނެގުނު ކަމަށް އެ ގްރޫޕުގެ ފައުންޑަރ އަފާ ހުސެއިން “ކުޅުދުއްފުށި އޮންލައިނަށް” މައުލޫމާތު ދެއްވަމުން ވިދާޅުވި އެވެ.

ސާޅީހަށްވުރެ ގިނަ އަދަދެއްގެ ވޮލަންޓިއަރުން ބައިވެރިވި މި ހަރަކާތުގައި ކުޅުދުއްފުށީ ކައުންސިލްގެ ނައިބު ރައީސް މުހައްމަދު އައިމަން ބައިވެރިވެލެއްވިކަން ފާހަގަކޮށްލެވެއެވެ.

މީގެ އިތުރުން އަފީފުއްދިީން ސްކޫލާއި ޖަލާލުއްދީން ސްކޫލްގެ ކެޑޭޓް ކުދިން އަދި ރެޑްކްރެސެންޓުން ވެސް ވަނީ މި ހަރަކާތުގައި ބައިވެރިވެފައިއެވެ.

ބިލީފް އަކީ ކުޅުދުއްފުށީގައި ކުނި ގިނަ ސަރަހައްދުން ކުނި ހޮވާ ސާފު ކުރާ ޒުވާނުންގެ ގުރޫޕެކެވެ. ސޯޝަލް މީޑިއާގައިވެސް ބޮޑު ތަރުހީބެއް ލިބެމުން އަންނަ މި ގްރޫޕުން ވަނީ މަހެއްހާ ދުވަސްތެރޭ ރަށުގެ ގިނަ ސަރަހައްދުތަކެއް ސާފުކޮށްފައެވެ.

މިލިޔުމާއި ގުޅޭ