ވިޔަވަތި ޕްރޮމޯޝަން ކަޕް ކުރިއަށްގެންދަނީ މިނިސްޓްރީގެ ހުއްދަނެތި

ށ އަތޮޅުގެ ސްކޫލްތަކުގެ މެދުގައި ކުރިއަށްގެންދިޔަ “ވިޔަވަތި ޕްރޮމޯޝަަނަލް ކަޕް” އަކީ އެޑިއުކޭޝަން މިނިސްޓްރީގެ އެކްޓިވިޓީ ކަލަންޑަރުގައި ހިމެނިފައިނުވާ އަދި އެޑިއުކޭޝަންގެ ހުއްދައެއް ނެތި ކުރިއަށްގެންދާ ހަރަކާތެއް ކަމަށް އެމިނިސްޓްރީން ބުނެފި އެވެ.

އެޑިއުކޭޝަން މިނިސްޓްރީން ށ. އަތޮޅުގެ ސްކޫލުތަކަށް ފޮނުވި އެންގުމެއްގައި ބުނެފައިވަނީ ސްކޫލުތަކުގެ މެދުގައި ހިންގާ އެފަދަ ހަރަކާތްތައް އެޑިއުކޭޝަން މިނިސްޓްރީގެ އެކްޓިވިޓީ ކަލަންޑަރުގައި ހިމެނެން ޖެހޭނެ ކަން ސިޓީގައި ފާހަގަ ކޮށްފައިވާނެ ކަމަށާއި ކަލަންޑަރުގައި ނުހިމެނޭ ހަރަކާތްތައް ކުރިއަށް ގެންދަން ޖެހޭނީ މިނިސްޓްރީގެ ހުއްދަ ހޯދައިގެން ކަމަށެވެ.

އެހެންނަމަވެސް އެއީ އެކްޓިވިޓީ ކަލަންޑަރުގައި ނުހިމެނޭ އަދި މިނިސްޓްރީގެ ހުއްދަ ނުހޯދައި ކުރިއަށްގެންދާ ހަރަކާތެއް ކަމަށާއި މިކަން ކުރިއަށް ނުގެންދިޔުމަށް އެކި ފަހަރު މަތިން ސްކޫލްތަކަށް އަންގާފައިވާނެ ކަމަށްވެސް މި އެންގުމުގައި ބުނެފައި ވެއެވެ.

ށ. އަތޮޅު ކައުންސިލުން އިސްނަގައިގެން އެ އަތޮޅު ސްކޫލްތަކުގެ މެދުގައި ކުރިއަށް ގެންދާ “ވިއަވަތި ޕްރޮމޯޝަނަލް ކަޕް”ގެ ސެމީ ފައިނަލް މެޗުގައި މިދިޔަ ހުކުރުދުވަހުގެ ރޭ ހިނގި ހަމަނުޖެހުމާ ގުޅިގެން، އެ މުބާރާތް ހުއްޓާލުމަށް އެޑިއުކޭޝަން މިނިސްޓްރީން ވަނީ އަންގާފަ އެވެ. އެހެން ނަމަވެސް އެ ނިންމުން ފަހުން ވަނީ ބާތިލުކޮށްފި އެވެ. އަދި އެންގުން ބާތިލް ކުރި ސަބަބެއް މިނިސްޓްރީން އަންގާފައެއް ނުވެއެެވެ.

ށ. ފޯކައިދު އާއި ފުނަދޫ ސްކޫލާ ދެމެދު ކުޅުނު ސެމީ ފައިނަލް މެޗަށް ފަހު، ވަނީ ދެ ޓީމުގެ ދެމެދުގައި މާރާމާރީ ހިންގައިފަ އެވެ. ފޯކައިދޫގައި ކުޅުނު އެ މެޗަށް ފަހު، ހިނގި ހަމަނުޖެހުމާ ގުޅިގެން ފުނަދޫ ޓީމު ޗޭންޖިން ރޫމުން ނުނިކުމެ ގާތްގަނޑަކަށް ހަތަރު ވަރަކަށް ގަޑިއިރު ތިބި ކަމަށް މައުލޫމާތު ލިބެއެވެެ.

އެޑިއުކޭޝަން މިނިސްޓްރީން ށ. އަތޮޅުގެ ސްކޫލުތަކަށް ފޮނުވި އެންގުމެއްގައި ބުނީ، ފޯކައިދޫގައި ކުޅުނު މެޗަށް ފަހު ހިނގައި ދިޔަ ހަމަނުޖެހުމުގައި، ދަރިވަރުންގެ ސަލާމަތާއި ރައްކާތެރިކަމަށް އެކަށީގެންވާ ފިޔަވަޅު އަޅާފައި ނުވާ ކަމަށެވެ. އަދި އެކަމާ ގުޅިގެން ގިނަ ބެލެނިވެރިންގެ ކަންބޮޑުވުން ވެސް މިނިސްޓްރީ އަށް ހުށަހަޅާފައިވާ ކަމަށް އެންގުމުގައި ބުނެފައިވެ އެވެ

ފުނަދޫ ޓީމު ފޯކައިދޫން ފުރުވާލާފައިވަނީ އެ ރޭ ދިހައެއް ޖަހާ ބޮޑުވި ފަހުން ފުލުހުންގެ ހިމާޔަތުގަ އެވެ.

ފޯކައިދު އާއި ފުނަދޫ ޓީމުގެ ދެމެދުގައި ހިނގި ހަމަނުޖެހުމާ ގުޅިގެން ފުނަދޫ ޓީމުގެ އޮފިޝަލަކު ވަނީ ހައްޔަރުކޮށްފަ އެވެ.