ކުޅުދުއްފުށީގައި ފަހުދުގެ ފްރީޑައިވިން ކޯހެއް ބާއްވަނީ

ކުޅުދުއްފުށީގައި ފްރީ ޑައިވިން ކޯހެއް ބޭއްވުމަށް ހަމަޖެހިއްޖެއެވެ.

ފަހުދު ފާއިޒުގެ އިންސްޓްރަކްޝަންގެ ދަށުން ކުރިއަށްދާނެ މި ކޯސް ފެށުމަށް ހަމަޖެހިފައި ވަނީ ޑިސެމްބަރު މަހުގެ 25 ވަނަ ދުވަހު އެވެ.

ފްރީޑައިވް މޯލްޑިވްސްގެ ފަރާތުން ކުރިއަށްގެންދާ މި ކޯހަކީ ފްރީ ޑައިވިން ލެވެލް 1 ގެ ކޯހެއް ކަމަށާއި މި ކޯސް ފުރިހަމަ ކުރުމުން ލިބިގެންދާނެ ސެޓްފިކެޓަކީ ދުނިޔޭގެ ފެންވަރުގައި ގަބޫލް ކުރާނެ ސެޓްފިކެޓެއް ކަމަށް ފްރީ ޑައިވިން އިންސްޓްރަކްޓަރ ފަހުދު ފާއިޒު ކުޅުދުއްފުށި އޮންލައިނަށް މައުލޫމާތު ދިނެވެ.

ފަހުދު ވިދާޅުވީ މި ކޯހުގައި ބައިވެރިންނަށް އޮކްސިޖަން ބޭނުންނުކޮށް ނޭވާ ހިފަހައްޓައިގެން ޑައިވިން ކުރަން ދަސްކޮށްދެވޭނެ އެވެ. އެގޮތުން 20 މީޓަރު އަޑިއަށް ޑައިވް ކުރުމުގެ ތަމްރީން ބައިވެރިންނަށް ދެވިގެންދާނެ ކަމަށާއި ކޯސްގެ ވޯޓަރ ސެޝަންތައް ކުރިއަށް ދާނީ ހުރިހާ ސޭފްޓީ ފިޔަވަޅުތައް އެޅުމަށް ފަހު ކަމަށް އޭނާ ވިދާޅުވިއެވެ.

17 އަހަރުން މަތިގެ ކޮންމެ ކުއްޖަކަށްވެސް ބައިވެރިވެވޭ މި ކޯހުގެ ފީ އަކީ ތިންހާސް ރުފިޔާކަމަށް ފްރީ ޑައިވް މޯލްޑިވެސްގެ ފަރާތުން ކުޅުދުއްފުއްޓާ ހަވާލުވެ ހުންނެވި އޭޖެންޓުން މައުލޫމާތު ދިނެވެ. އަދި މި ކޯހުގައި ބައިވެރިވާން ބޭނުންވާ ފަރާތްތަކުން 7932128 ގުޅުމުން ބައިވެރިވެވޭނެ ކަމަށް އެތަނުން ބުނެއެވެ.

މި ކޯސް ކުރިޔަށް ދަނީ 10 ދުވަހުގެ މުއްދަތަކަށެވެ. އަދި މި ކޯހަށް ބެޗެއްގައި 5 ބައިވެރިން ހިމެނޭނެހެން ގިނަވެގެން 5 ބެޗު ހޮވުމަށް ހަމަޖެހިފައި ވެއެވެ.

ފްރީޑައިވް މޯލްޑިވްސް އިން މީގެ ކުރިން މި ކޯސްވަނީ އދ އާއި އައްޑު އަތޮޅުގައިވެސް ކުރިއަށް ގެންގޮސްފަ އެވެ.

މި ކޯހުގެ އިންސްޓްރަކްޓަރ ފަހުދަކީ ތިން ގައުމީ ރެކޯޑަކާ އެކު ބައިނަލްއަގްވާމީ ޑައިވިން މުބާރާތެއްގެ ހަވަނަ ހޯދާ ބައިނަލްއަގްވާމީ ފެންވަރުގެ އިންސްޓްރަކްޓަރ ފްރީ ޑައިވިން ކޯސް ފުރިހަމަ ކުރި ރާއްޖޭގެ ފުރަތަމަ ފްރީ ޑައިވިން އިންސްޓްރަކްޓަރެވެ.

އޭނާ ވަނީ ތައިލެންޑްގެ ޕުކެޓްގައި ކުރިއަށްދިޔަ އަންޑަމަން ފްރީ ޑައިވިން ޗެލެންޖުގައި 3 މިނިޓް 18 ސިކުންތު ވަންދެން ނޭވާ ހިފަހައްޓައިގެން ޑައިވް ކުރުމާއި ފިންސާ އެކު އެއްނޭވައިން 69 މީޓަރު އަޑިއަށް ޑައިވް ކުރުމުގެ އިތުރުން ފިންސާ ނުލައި 46 މީޓަރު އަޑިއަށް އެއްނޭވައިން ފީނުމުގެ ރާއްޖޭގެ ރެކޯޑެއް ހަދާފައިއެވެ.