އުރީދޫ އިން ސަބްމެރިން ކޭބަލް އެޅުމުގެ ޕްރޮޖެކްޓް ފަށައިފި

އުރީދޫ މޯލްޑިވްސްއިން ދިވެހިރާއްޖޭގެ އުތުރުން ދެކުނަށް ފައިބަރ އޮޕްޓިކް ސަބްމެރިން ކޭބަލް އެޅުމަށްޓަކައި ހުއާވޭ މެރިން އާއިއެކު 25 މިލިއަން ޑޮލަރުގެ ޕްރޮޖެކްޓެއް ރޭ ފަށައިފިއެވެ.

ހުއާވޭ މެރިން 100ޖީ ޓެކްނޮލޮޖީ މެދުވެރިކޮށް 1200 ކިލޯމީޓަރގެ ސަރަހައްދަކަށް ފެތުރިގެންދާގޮތަށް އެޅިގެންދާ ފައިބަ އޮޕްޓިކް ސަބްމެރިން ކޭބަލްގެ ސަބަބުން ދިވެހިރާއްޖޭގެ އިންޓަނެޓް ޚިދުމަތުގެ ފެންވަރަށް ފާހަގަކުރެވޭނެ ބޮޑު ކުރިއެރުމެއް ލިބިގެންދާނެއެވެ.

ދިވެހިރާއްޖޭގެ ބްރޯޑްބޭންޑް ޕޮލިސީގެ ދަށުން، ސާރކް ސަރަހައްދުގައި އައި.ސީ.ޓީގެ ދާއިރާއިން އެންމެ ކުރިއަރާފައިވާ ގައުމަށް ދިވެހިރާއްޖެ ހެދުމަށް ކަނޑައަޅާފައިވާ ލަނޑުދަނޑި ހާސިލްކުރުމަށް މި ޕްރޮޖެކްޓްގެ ސަބަބުން ވަރަށް ބޮޑު ކުރިއެރުމެއް ލިބިގެންދާނެ ކަމަށާއި މީގެ އިތުރުން، މަތީ ބޭންޑްވިޑްތުތަކަށް ހިދުމަތް ފޯރުކޮށްދިނުމަށްޓަކައި އުރީދޫގެ ނެޓްވާކްގެ ކެޕޭސިޓީ އިތުރު ކުރެވި، އުރީދޫއަށް ދިވެހިރާއްޖޭގެ ރަށްތަކާއި ރިސޯޓްތަކަށް ބޭނުންވާ މުވާސަލާތީ ހިދުމަތްފޯރުކޮށްދިނުމަށްޓަކައި އެންމެ އެކަށޭނަ ނެޓްވާކެއް ގާއިމްކުރެވިގެންދާނެ ކަމަށް އުރީދޫއިން މައުލޫމާތު ދެއެވެ.

އުރީދޫގެ މި ހިދުމަތުގެ ސަބަބުން ދިވެހިރާއްޖޭގެ މުވާސަލާތީ އިންފްރާސްޓްރަކްޗަރ ތަރައްގީކޮށް، ދިވެހިރާއްޖެ ޑިޖިޓަލް ކުރިމަގަކަށް ހުޅުވާދިނުމުގައި އަދާކުރަމުންގެންދާ ދައުރަށް އިތުރު ބާރެއް ލިބިގެންދާނެކަމަށާއި ފިކްސްޑް ލައިން އާއި މޯބައިލް މަނީ ފަދަ އާ ހިދުމަތްތައް ފޯރުކޮށްދިނުމަށް އުރީދޫ ކުރިމަތިލާއިރު، ނޭޝަންވައިޑް ސަބްމެރިން ކޭބަލްގެ ސަބަބުން މޯބައިލް ބްރޯޑްބޭންޑާއި ފައިބަރ އިންޓަރނެޓްގެ ހިދުމަތްތައް ގޭގެއަށާއި ވިޔަފާރިތަކަށް ބޭނުންވާ މިންވަރަށް ފޯރުކޮށްދެވޭނެ އެވެ.

މީގެ އިތުރުން އުރީދޫއިން ވަނީ ދިވެހިރާއްޖެއަށް 2ޖީ އެޖް، 3ޖީ އަދި 4ޖީ އެލްޓީއީ ނެޓްވާކް ތައާރަފްކޮށްދީ، ބައިނަލްއަގްވާމީ މުވާސަލާތީ ދާއިރާގެ އެންމެ ފަހުގެ ޓެކްނޮލޮޖީ ދިވެހިރާއްޖެއަށް ތައާރަފްކޮށްދިނުމުގެ އެންމެ ކުރީސަފުގައި ފައިތިލަ ސާބިތުކޮށްފައެވެ.

އުރީދޫގެ ގައުމީ ސަބްމެރިން ކޭބަލް އަޅާ ނިންމާލެވޭނީ 2016 ގެ ނިޔަލަށެވެ.