އިލްމީ ދަސްވާރުގެ ހަވަނަ ޕްރޮގްރާމުގެ ދަށުން ކުޅުދުއްފުށީގައި ހާއްސަ ދަރުސްތަކެއް ބޭއްވުމަށް ހަމަޖެހިއްޖެ

އިލްމީ ދަސްވާރުގެ ހަވަނަ ޕްރޮގްރާމުގެ ދަށުން ހާއްސަ ދަރުސްތަކެއް ކުޅުދުއްފުށީ ހުކުރު މިސްކިތުގައި ބޭއްވުމަށް ހަމަޖެހިއްޖެ އެވެ.

ކުޅުދުއްފުށީ “މަކްތަބާ ސަލަފިއްޔާ”ގެ ފަރާތުން އިންތިޒާމުކޮށްގެން ބާއްވާ މި ދަރުސްތައް ކުރިއަށް ދާނީ މި މަހުގެ 22 އިން މި މަހުގެ ނިޔަލަށެވެ.

މި ދަސްވާރުގައި ދަރުސް ދެއްވާނީ އުސްތާޒް މުހައްމަދު ރިފާދު އަދި އުސްތާޒް އަބޫ އަނަސް މުހައްމަދު ހަސަން އެވެ. މި ދަރުސްތަކުގައި ރިޔާޟުއް ޞާލިޙީންގެ ބައެއް ބާބުތަކާއި އަލްއަރްބައޫން އަންނަވަވިއްޔާގެ ބައެއް ހަދީޘްތައް ކިޔަވައި ދިނުމަށް ހަމަޖެހިފައިވެއެވެ.

މި ދަރުސްތައް މަކްތަބާ އޮންލައިން ރޭޑިއޯއިންނާއި www.salafi.mv ވެބްސައިޓުން އޮންލައިންކޮށް އަޑުއެހޭނެ ކަމަށް މަކްތަބާ ސަލަފިއްޔާއިން ބުނެއެވެ.

ހުކުރު މިސްކިތުގައި ކުރިއަށްގެންދާ މި ދަސްވާރު އާންމުގޮތެއްގައި ކުރިއަށް ގެންދާނީ ފަތިސް ނަމާދާއި އަޞްރު ނަމާދާއި އަދި އިޝާ ނަމާދަށްފަހު އެވެ.