ބަނދަރުގެ މަސައްކަތާއި މެދު ހިތްހަމަނުޖެހިގެން ނެއްލައިދޫ ރައްޔިތުން އިހްތިޖާޖު ކޮށްފި

ހދ ނެއްލައިދޫގެ ބަނދަރުގެ މަސައްކަތް ކުރިއަށްދާގޮތާ މެދު ހިތްހަމަނުޖެހުން ފާޅުކޮށް އެރަށު ރައްޔިތުން މިއަދު އިހްތިޖާޖު ކޮށްފި އެވެ.

“ކުޅުދުއްފުށި އޮންލައިނަށް” މައުލޫމާތު ދެއްވަމުން ނެއްލައިދޫ ކައުންސިލުން ވިދާޅުވީ މިއަދު ހެނދުނު 10:30 ހާއިރު ފެށި މި އިހްތިޖާޖު ނިންމާލާފައިވަނީ ރައްޔިތުންގެ ހަތަރު ޑިމާންޑެއް ކައުންސިލަށް ހުށަހަޅާފަ ކަމަށެވެ.

އެގޮތުން ބޭރުތޮށި ބަނދަރުގެ ދެކުނު ކަނާ ހަމައަށް ބަދަލުކުރުމާ އެކު ބޭރު ފައިކަށި ފަންސާސް ފޫޓަށް ދިގުކުރުމަށާއި، ނެރު ކަނޑިންމައަށް ރާޅު ނުވަންނާނެހެން ހެދުމަށާއި، ދެކުނު ފައިކަށި ރަށުގެ ފަސްގަނޑާ ގުޅުވުމުގެ އިތުރުން ބަދަރުގެ ދެކޮޅުގައި ޕޭވްމެންޓް ގާ ޖެހުމަށް ރައްޔިތުން ވަނީ ޑިމާންޑް ކޮށްފަ އެވެ. އަދި އޭގެ އިތުރުން ބަނދަރުގައި ޖެހުމަށް ލައިޓުތަކުގެ އަދަދު 17 ނުވަތަ 20 އިތުރުކޮށް ދިނުމަށްވެސް ވަނީ ރައްޔިތުން އެދިފަ އެވެ.

އެރަށު ކައުންސިލުން ވިދާޅުވީ ރައްޔިތުންގެ ޑިމާންޑްތަށް ވާނީ ސިޓީ އަކުން ހައުސިން މިނިސްޓްރީއަށް އަދި ހދ އަތޮޅު ކައުންސިލަށް ވެސް ހުށަހަޅާފަ ކަމަށާއި އެހެންނަމަވެސް އެއްވެސް ފަރާތަކުން އަދި ޖަވާބު ލިބިފައި ނުވާކަމަށެެވެ. އޭގެ އިތުރުން ބަނދަރުގެ މަސައްކަތް ހަވާލުކޮށްފައިވާ ހެވީ ފޯސްއަށް ވެސް ރައްޔިތުންގެ ޑިމާންޑްތަށް ހުށަހަޅާފައިވާނެ ކަމަށް އެރަށު ކައުންސިލުން މައުލޫމާތު ދިނެވެ.

ރައްޔިތުންގެ ޑިމާންޑްތަކަށް އަމަލީ ސިފައެއް ނުގެނެސް މަސައްކަތް ކުރިއަށް ދާނަމަ ރައްޔިތުން ނުކުމެ ބަނދަރު ގެ މަސައްކަތަށް ހުރަސް އަޅާނެކަމަށް މިއަދުގެ އިހްތިޖާޖް ގައި ރައްޔިތުން ވަނީ ބުނެފައެވެ. އަދި ބައެއް މީހުން ގެންގުޅުނު ޕޯސްޓަރުތަކުގައި ހައުސިން މިނިސްޓަރ މުއިއްޒުގެ އިސްތިއުފާއަށް ވެސް ގޮވާލާފައިވެ އެވެ.