ސިޒޭރިއަން ހެދި މިހާ މިއަދު މާލެ ގެންދަނީ

ސިޒޭރިއަން ހެދުމުގެ ތެރޭގައި ދިމާވި “މައްސަލައަކާ ގުޅިގެން” ލޭ މަނާ ނުވެ ހާލު ސީރިއަސްވި މީހާ މިއަދު މާލެ ގެންދަން ހަމަޖެހިއްޖެ އެވެ.

“ކުޅުދުއްފުށި އޮންލައިނަށް” މައުލޫމާތު ދެމުން އޭނާގެ ފިރިމީހާ ބުނީ މިއަދު މެންދުރު 12:30 ހާއިރު އަންހެނުން އެއާޓެކްސީގައި މާލެ ގެންދިއުމަށް ހަަމަޖެހިފައިވާ ކަމަށެވެ.

”  އަދިވެސް ހާލު ވަރަށް ދެރަ. ހޭއަރަނީވެސް 50 ޕަސެންޓް ” މުހައްމަދު ބުންޏެވެ.

ކުއްލިގޮތަކަށް އޮޕަރޭޝަން ކުރުމަށް ފަހު ލޭ މަނާ ނުވުމުގެ ސަބަބުން އޭނާ ނޭވާލަވަމުން ދިޔައީ މެޝިނުގެ އެހީގަ އެވެ. އަދި ރަހިމް ނެގުމުން ލޭ މަނާ ވާނެކަމަށް ބުނެ އޭނާ ރަހިމްވެސް ވަނީ ނަގާފަ އެވެ. އެހެން ނަމަވެސް ލޭ މަނާ ވުން ހުއްޓިފައެއް ނުވެ އެވެ.

ލޭ މަނާވުން ހުއްޓުވުމަށް ލޭގެ ދެމާއްދާއެއް ކަމަށްވާ ޕްލާސްމާ އާއި ޕްލެއިޓްލެޓްސް ވަނީ މާލެއިން ގެނެސްފަ އަދި ބައެއް އިންޖެކްޝަން ވެސް މާލެއިން ގެނެސްފައިވެ އެވެ.

33 އަހަރުގެ މިއަންހެން މީހާއަށް ފަރުވާ ދިނުމަށްޓަކާ ރޭގެ ވަގުތެއްގައި ވަނީ މާލެއިން އަންހެނުންގެ ޑޮކްޓަރެއް ގެނެސްފަ އެވެ.