ސިޒޭރިއަން ހެދުމުގެ ތެރޭގައި ހާލު ސީރިއަސްވި މީހާ ސީޕްލޭންގައި މާލެ ގެންގޮސްފި

ސިޒޭރިއަން ހެދުމުގެ ތެރޭގައި ދިމާވި “މައްސަލައަކާ ގުޅިގެން” ލޭ މަނާ ނުވެ ހާލު ސީރިއަސްވި މީހާ އެމަޖެންސީކޮށް ސީޕްލޭނެއްގައި މާލެ ފުރުވާލައިފިއެވެ.

އެ މީހާ މާލެ ގެންދިއުމަށް ޓީއެމްއޭގެ ސީޕްލޭން ކުޅުދުއްފުށި ސަރަހައްދީ ބަނދަރު ސަރަހައްދަށް ޖައްސާފައިވަނީ މިއަދު މެންދުރު 12:30 ގައިއެވެ. އަދި  ހާލު ސީރިއަސް މީހައާއެކު ސީޕްލޭން ފުރާފައިވަނީ 2 ޖަހާ އެހާކަށްހާ އިރު އެވެ.

ހާލު ސީރިއަސްވި މީހާ އެމްބިއުލާންސްގައި ގެންނަނީ– ފޮޓޯ: ވާހިދު

“ކުޅުދުއްފުށި އޮންލައިނަށް” މައުލޫމާތު ދެމުން އޭނާގެ ފިރިމީހާ ބުނީ އަނބިމީހާގެ ހާލު އަދިވެސް ވަރަށް ދެރަ ކަމަށާއި ރަނގަޅަށް ހޭވެސް ނާރާ ކަމަށެވެ.

ކުއްލިގޮތަކަށް އޮޕަރޭޝަން ކުރުމަށް ފަހު ލޭ މަނާ ނުވުމުގެ ސަބަބުން އޭނާ ނޭވާލަވަމުން ދިޔައީ މެޝިނުގެ އެހީގަ އެވެ. އަދި ރަހިމު ނެގުމުން ލޭ މަނާ ވާނެކަމަށް ބުނެ އޭނާ ރަހިމްވެސް ވަނީ ނަގާފަ އެވެ. އެހެން ނަމަވެސް ލޭ މަނާ ވުން ހުއްޓިފައެއް ނުވެ އެވެ.

ލޭ މަނާވުން ހުއްޓުވުމަށް ލޭގެ ދެމާއްދާއެއް ކަމަށްވާ ޕްލާސްމާ އާއި ޕްލެއިޓްލެޓްސް ވަނީ މާލެއިން ގެނެސްފަ އަދި ބައެއް އިންޖެކްޝަން ވެސް މާލެއިން ގެނެސްފައިވެ އެވެ.

33 އަހަރުގެ މިއަންހެން މީހާއަށް ފަރުވާ ދިނުމަށްޓަކާ ރޭގެ ވަގުތެއްގައި ވަނީ މާލެއިން އަންހެނުންގެ ޑޮކްޓަރެއް ގެނެސްފަ އެވެ.