މުޒާހަރާގެ ސަބަބުން ހޮސްޕިޓަލުގައި ތިބި ބަލި މީހުން ނުތަނަވަސްކަމެއްގެ ތެރެއަށް!

ކުޅުދުއްފުށި ރީޖަނަލް ހޮސްޕިޓަލުގައި ގިނަ ބަޔަކު ވަދެ މުޒާހަރާ ކުރުމުގެ ސަބަބުން ހޮސްޕިޓަލަށް ދައްކަން އައިސް ތިބި ބަލި މީހުންނަށް އުނދަގޫ ވެގެން ޝަކުވާކޮށްފި އެވެ.

ސިޒޭރައަން ހެދުމުގެ ތެރޭގައި ހާލު ސީރިއަސްވި އައިޝަތު ފަރިޔާލު ނިޔާވުމާ ގުޅިގެން ކުރަމުންދާ މި މުޒާހަރާގައި ބައިވެރިން ހޮސްޕިޓަލް ތެރޭގައި ދަނީ އަޑުގަދަކުރަމުން ނެވެ.

ގިނަ އަދަދެއްގެ ފުލުހުން ހޮސްޕިޓަލުގެ ތެރޭގައި ހަރަކާތްތެރިވަމުން ދިޔަކަމުގައި ވިޔަސް، މުޒާހަރާގެ ބައިވެރިން ދަނީ އަޑުގަދަ ކުރަމުންނެވެ. މުޒާހަރާ ކުރާމީހުން ކޮންމެވެސް ވަރަކަށް ފަހަތައް ޖައްސައިފައި ވީނަމަވެސް، އެމީހުން އެސަރަހައްދުން ބޭރުކުރުމަށް ފުލުހުން މާބޮޑު މަސައްކަތެއް ކުރާތަނެއް ނުފެނެއެވެ.

ހޮސްޕިޓަލްގައި އެޑްމިޓްކޮށްފައި އޮތް ބަލިމީހެއްގެ އެހީތެރިއެއް ވާހަކަ ދައްކަމުން ބުނީ، މުޒާހަރާ ކުރާބައެއްގެ ސަބަބުން ބަލިމީހުންނަށް އުނދަގޫ ފޯރައިގެން ނުވާނެ ކަމަށާއި އެމީހުން ހުއްޓުވުމަށް ފުލުހުން ނުކުޅެދިފައި ވާކަމަށެވެ. އަދި ކޮންމެ ކަމެއް ގޯހުން ގޮސްފައި ވީނަމަވެސް ހޮސްޕިޓަލުގައި ތިބި ބަލިމީހުންނަށް އުނދަގޫ ވާވަރަށް ހަޅޭއްލަވައި އަޑުގަދަކޮށް، ނަފްސާނީ ބިރުވެރިކަމެއްގެ ތެރެއަށް ވައްޓާލައިގެން ނުވާނެ ކަމަށްވެސް އޭނާ ބުންޏެވެ.

މުޒާހަރާގެ ބައިވެރިން ދަނީ ހޮސްޕިޓަލުގެ އޯޕީޑީ ސަރަހައްދަށް ވަދެ ހޮސްޕިޓަލުގެ އިސްވެރިންގެ އިސްތިއުފާއަށް ގޮވަމުންނެވެ. އަދި ހަޑިހުތުރު ބަހުން ދަނީ އެއްޗެހި ގޮވަމުންނެވެ.