ހޮސްޕިޓަލުގައި ހުރި މައްސަލަތައް މިނިސްޓްރީއަށް ކުރިންވެސް ވަނީ އަންގާފަ: މެނޭޖަރ

ކުޅުދުއްފުށީ ރީޖަނަލް ހޮސްޕިޓަލަށް ދިމާވެފައިވާ މައްސަލަތައް މީގެ ކުރިންވެސް ހެލްތް މިނިސްޓްރީގެ ސަމާލުކަމަށް ގެނެސްފައިވާނެ ކަމަށް ހޮސްޕިޓަލްގެ މެނޭޖަރ ހެލްތް ސާވިސަސް އިބްރާހިމް ވަހީދު ވިދާޅުވެއްޖެ އެވެ.

“ކުޅުދުއްފުށީ އޮންލައިނަށް” މައުލޫމާތު ދެއްވަމުން އިބްރާހިމް ވަހީދު ވިދާޅުވީ ވަސީލަތްތަކުގެ މައްސަލައާއި މުވައްޒަފުންގެ މައްސަލަވެސް މިނިސްޓްރީގައި ދަންނަވާފައިވާނެ ކަމަށާއި މިކަމާ ބެހޭގޮތުން އިތުރު އެއްޗެއް ދެންނެވެން ނެތް ކަމަށެވެ.

މިނޫހަށް މައުލޫމާތު ދެމުން އެހޮސްޕިޓަލުގެ ބައެއް މުވައްޒަފުން ބުނީ މެނޭޖްމެންޓް ބޮލަށް ހުރިހާ އެއްޗެއް ޖަހާފައި މިނިސްޓްރީއަށް ކަމުން ނުރެކެވޭނެ ކަމަށާއި އެންމެ ބޮޑަށް ހޮސްޕިޓަލަށް ދިމާވެފައިވަނީ ވަސީލަތްތައް ނެތުމުގެ މައްސަލަ ކަމަށެވެ.

އެމައްސަލައިގައި ތަކުރާރުކޮށް މިނިސްޓްރީއަށް ހުށަހަޅައިފައިވާއިރު މިހާތަނަނަށް އައިރު އެކަމަށް މިނިސްޓްރީން އެކަށީގެންވާ އިޖާބަ ނުދޭކަން އެމީހުން ބުންޏެވެ. އަދި ހޮސްޕިޓަލުގެ މެނޭޖްމެންޓް “ފީކަޅާވުމުން” އެކަމުގެ ވާހަކަވެސް މިނިސްޓްރީއަށް ދަންނަވާފައިވާނެ ކަމަށް އެމީހުން ކިޔައިދިނެވެ.

ކުޅުދުއްފުށީ ހޮސްޕިޓަލްގެ ސިއްހީ ހިދުމަތް ފޯރުކޮށްދިނުމަށް ދިމާވާ ގިނަ މައްސަލަތަކެއް ހުރި ކަމަށް ހެލްތް މިނިސްޓްރީން މިއަދު ވިދާޅުވެފައި ވާއިރު މިކަމާ ބެހޭގޮތުން އިތުރު ބަހެއް ހޮސްޕިޓަލްގެ ފަރާތުން ވަނީ ލިބޭގޮތް ނުވެފައެވެ.

ހެލްތް މިނިސްޓްރީން މައިގަނޑު ގޮތެއްގައި އަލިއަޅުވާލާފައިވަނީ ވަސީލަތްތަށް ނެތުމާއި ހޮސްޕިޓަލަށް އެކަށީގެންވާ ވަރަށް ޑޮކްޓަރުންނާއި ނަރުހުން ހަމަޖެހިފައިނެތުމާއި މުވައްޒަފުންނަށް ބޭނުންވާ ވަރަށް ތަމްރީން ލިބިފައި ނެތް މައްސަލައެެވެ.

މި މައްސަލަތަކަކީ، ސީދާ ކުޅުދުއްފުށީގެ ހޮސްޕިޓަލުގެ މެނޭޖްމަންޓުގެ ސަބަބުން ދިމާވާ މައްސަލައެއް ކަމެއް ނުވަތަ މިނިސްޓްރީގެ އިހުމާލުން ހޮސްޕިޓަލްތަކުގެ ހިންގުމަށް އެހީތެރިނުވުމުގެ ސަބަބުން ދިމާވި މައްސަލައެއް ކަމެއް އަދި ނޭގެއެވެ.