“ގުންޑޮޅި ހޯހޯ” ގެ ނަމުގައި މަކުނުދޫގައި ވޯޓަރ ސްޕޯރޓްސް ހަރަކާތްތަކެއް ދައްކާލަނީ

ހދ މަކުނުދޫގައި “ގުންޑޮޅި ހޯހޯ” ގެ ނަމުގައި ވޯޓަރ ސްޕޯރޓްސްގެ ހަރަކާތްތަކެއް ބޭއްވުމަށް ހަމަޖެހިއްޖެ އެވެ.

މުޅި ރާއްޖެއަށް ހުޅުވާލައިގެން ކުރިއަށްދާ މި ހަރަކާތުގައި ކައިޓް ސާފިން އަދި ވިންޑް ސާފިން ފަދަ ހަރަކާތްތައް ދައްކާލެވިގެން ދާނެ ކަމަށް މި ހަރަކާތް އިންތިޒާމު ކުރާ ފަރާތުން “ކުޅުދުއްފުށި އޮންލައިނަށް” މައުލޫމާތު ދިނެވެ.

މަކުނުދޫ ޒުވާނުންތަކެއް އިސްނަގައިގެން ކުރިއަށް ގެންދާ މި ހަރަކާތް ފެށުމަށް ހަމަޖެހިފައިވަނީ އެޕްރިލް މަހުގެ 20 ވަނަ ދުވަހު އެވެ. އަދި މި ހަރަކާތް ފަސް ދުވަހުގެ މުއްދަތަކަށް ކުރިއަށްދާނެ ކަމަށް އެފަރާތުން ބުނެއެވެ.

މި އިވެންޓުގައި ބައިވެރިވުމުގެ ފުރުސަތު އަތޮޅަށް ހުޅުވާލެވިވިފައިވާއިރު އެކި ރަށްރަށުން މަކުނުދޫއަށް ޒިޔާރަތް ކުރާނެ ބައިވެރިންގެ ކެއުމާއި އެކޮމޮޑޭޝަންގެ ކަންތައްތައް ޒުވާނުންގެ ފަރާތުން ހަމަޖެހިގެންދާނެ ކަމަށްވެސް އެ ފަރާތުން ހާމަކުރެއެވެ.

މިކަމުގެ އިސްކޮށްއުޅޭ ފަރާތެއް ކަމަށްވާ އަދުހަމް ބުނީ މި ހަރަކާތް ކުރިއަަށްދާނީ ބޮޑު އިވެންޓެއްގެ ގޮތުގައި ކަމަށާއި މިހާތަނަށް ތިރީހަކަށް ސާފަރުން މި ހަރަކާތުގައި ބައިވެރިވުމަށް ހަމަޖެހިފައިވާ ކަމަށެވެ. އަދި މި ހަރަކާތުގައި އިތުރަށް ބައިވެރިވާން ބޭނުންވާ ފަރާތްތަކަށް އެ ފުރުސަތުވެސް އެބައޮތް ކަމަށް އެ ފަރާތުން ބުންޏެވެ.

މި ހަރަކާތުގައި ކުޅުދުއްފުށި އޯޕަން ވޯޓަރ ސްޕޯރޓްސްގެ ފަރާތުންވެސް ގިނަ އަދަދެއްގެ ސާފަރުން ބައިވެރިވުމަށް ހަމަޖެހިފައިވާ ކަމަށް އެ ފަރާތުން މައުލޫމާތުދެއެވެ.

ރީތި ތުނޑިއަކާއި މޫދެއް އޮންނަ މަކުނުދޫއަކީ ކައިޓް އަދި ވިންޑް ސާރފް ކުރުމަށް ގިނަ ބައެއްގެ މެދުގައި މަގުބޫލު ތަނެއްކަން ފާހަގަކޮށްލެވެއެވެ.