ރޯ ހައުސްގެ ގުރުއަތުލުން އަލުން ބާއްވާނެ ތާރީހު ކަނޑައަޅައިފި

ގެދޮރުވެރިކަމުގެ ޕްްރޮގުރާމުގެ ދަށުން ކުޅުދުއްފުށީ ރައްޔިތުންނަށް ހާއްސަކޮށްގެން އަޅާފައިވާ 100 ރޯހައުސްގެ ތެރެއިން 22 ރޯހައުސްލިބޭނެ ފަރާތެއް ކަނޑައެޅުމަށް ބާއްވާ ގުރުއަތުލުން އަންނަ މަހު 4 ގައި ބާއްވަން ރަށު ކައުންސިލުން ކަނޑައަޅައިފިއެވެ.

ރޯހައުސް ލިބޭ ފަރާތުގެ މެދުގައި ގުރުއަތުލުން އަލުން ބޭއްވުމަަށް ނިންމީ، ކުރިން ގުރުއަތުލާފައިވަނީ ރޯހައުސްއަށް އެދި ހުށަހަޅާ ފޯމުގައިވާ ގޮތާ ހިލާފަށް ކަމަށާއި އަލުން ގުރުއަތުލުން ބޭއްވުމަށް އޭސީސީން ކުޅުދުއްފުށީ ކައުންސިލަށް އެންގުމުންނެވެ.

ކުރިން ލައިފައިވާ ގުރުއަތުގައި 25 ޕޮއިންޓް ލިބުނު ފަރާތްތަކާއެކު 20 ޕޮއިންޓް ލިބުނު ފަރާތްތައްވެސް ގުރުއަތުގައި ބައިވެރިކޮށްފައި ވެއެވެ.

ނަމަވެސް ކައުންސިލުން ގުރުއަތުލުމުގައި 25 ޕޮއިންޓު ލިބުނު ފަރާތާއެކު 20 ޕޮއިންޓް ލިބުނު ފަރާތްތައް ހިމަނާފައިވަނީ ހައުސިން މިނިސްޓްރީން އެގޮތަށް އެންގުމުން ކަމަށް ކަށަވަރުވާފަދަ ސިޓީތަކެއް ކުޅުދުއްފުށި އޮންލައިނަށް ވަނީ މީގެ ކުރިން ލިބިފައިއެވެ.

އަލުން ބާއްވާ ގުރުއަތުލުމާ ބެހޭ ތަފުސީލީ މައުލޫމާތެއް ކައުންސިލުން ލިބޭގޮތްވަނީ ނުވެފައެވެ. ކުޅުދުއްފުށީ ކައުންސިލްގެ ރައީސް އަލީ މުހައްމަދާ ހަވާލާދީ ބައެއް ދުވަހު ނޫސްތަކުގައި ބުނެފައިވަނީ ކުރިންވެސް ގުރުއަތުލައިފައިވަނީ ސަރުކާރުން އަންގާފައިވާ ގޮތައް ކަމަށާއި މިފަހަރުވެސް ގުރުއަތުލާނީ ހަމަ މި މައްސަލައިގައި ސަރުކާރާއެކު ކުރެވުނު މަޝްވަރާތަކަށްފަހު ސަރުކާރުން އެންގި ގޮތަށް ކަމަށެވެ.

އަދި ލަސް ތަކެއް ނުވެ ހުރިހާ ރޯހައުސްއެއް ހޮވިފައިވާ ފަރާތް ތަކަށް ހަވާލު ކުރެވިގެން ދާނެ ކަމަށެވެ.

ކުޅުދުއްފުށީގައި އަޅާފައިވާ 160 ރޯހައުސްގެ ތެރެއިން މުޅި ރާއްޖެއަަށް ހުޅުވާލެވުނު 60 ރޯހައުސްއަށް ކުރިމަތިލި 157 ފަރާތުގެ ގުރުއަތުލުން މިނިސްޓްރީގެ އެންގުމަށް މިހާރުވަނީ މަޑުޖައްސާލާފައެވެ.