ހދ އަތޮޅުގެ ރަށްރަށުގެ ކައުންސިލްތައް މޮނިޓަރ ކުރުމުގެ ދެވަނަ ބުރު ފަށައިފި

ހދ އަތޮޅު ރަށު ކައުންސިލްތަކުގެ އިދާރީ މަސައްކަތް ހަރުދަނާ ކުރުމުގެ ގޮތުން ބާއްވާ ކައުންސިލް މޮނިޓަރ ކުރުމުގެ ޕްރޮގުރާމުގެ ދެވަނަ ބުރު އިއްޔެ ފަށައިފި އެވެ.

އެގޮތުން އިއްޔެ ނޮޅިވަރަމް ކައުންސިލުގައި މި ޕްރޮގުރާމް ކުރިއަށް ގެންގޮސްފައިވާއިރު މިއަދު ނޮޅިވަރަމްފަރު ކައުންސިލްވެސް ވަނީ މި ޕްރޮގުރާމްގެ ދަށުން މޮނިޓަރ ކޮށްފައިއެވެ. މީގެ އިތުރުން ދެވަނަ ބުރުގައި ހަނިމާދޫ، ފިނޭ، ހިރިމަރަދޫ، ނެއްލައިދޫ އަދި ވައިކަރަދޫގައިވެސް މި ޕްރޮގުރާމް ޝެޑިއުލް ކުރެވިފައިވެއެވެ.

މިޕްރޮގްރާމުގައި މުވައްޒަފުންގެ ރެކޯޑުތަކާއި، ފައިސާގެ ހިސާބުތަކާއި، ކައުންސިލްގެ ޖަލްސާތަކާބެހޭ ލިއުންތަކާއި، ރަށުކައުންސިލްތަކުން ފާސްކޮށް އަމަލުކުރަންޖެހޭ ގަވާއިދުތައް ފާސްކުރެވިފައިވޭތޯ ބެލިގެންދާނެއެވެ. އަދި ގާނޫނުން ލާޒިމުކުރާ ލިއުންތައް ކަނޑައެޅިފައިވާ ތާރީހުތަކުގައި ފޮނުވަންޖެހޭ ފަރާތްތަކަށް ފޮނުވިފައިވޭތޯ އާއި، އަތޮޅުކައުންސިލް އިދާރާއިން ރަށުކައުންސިލް އިދާރާތައް މެދުވެރިކޮށް ހިންގޭ ޕްރޮގްރާމުތައް ކުރިޔަށްގެންދެވިފައިވާ ގޮތް ބެލޭނެއެވެ.

މި ޕްރޮގުރާމްގެ ފުރަތަމަ ބުރު މިދިޔަ އަހަރު ބޭއްވިއިރު ޖުމްލަ 6 ކައުންސިލެއް ވަނީ މޮނިޓަރ ކޮށްފައިއެވެ. އެއީ ކުޅުދުއްފުށީ، މަކުނުދޫ، ނޭކުރެންދޫ، ކުމުންދޫ، ކުރިނބި އަދި ނާވައިދޫ އެވެ.

އަދި ޝެޑިއުލް ކުރެވިފައިވާގޮތައް މޮނިޓަރ ކުރިއަށް ގެންދާނަމަ ފެބްރުއަރީ މަހުގެ 18 ވަނަ ދުވަހަށް ހދ އަތޮޅުގެ ހުރިހާ ކައުންސިލްތަކެއް އެއްކޮށް މޮނިޓަރކޮށް ނިންމާލެވޭނެ ކަމަށް އަތޮޅު ކައުންސިލުން މައުލޫމާތު ދެއެވެ.

ކައުންސިލްތައް މޮނިޓަރކުރުމަށް ހިންގާ މި ޕްރޮގުރާމުގައި، ފާހަގަކުރެވޭ މައްސަލަތަކާ ގުޅޭ މުވައްޒަފުންނަށް އެމައްސަލަތައް ހައްލުކުރާނެ ގޮތުގެ އިރުޝާދު ދެވިގެންދާނެއެވެ.