ދިރާގުން އައިޖީއެމްއެޗްގައި ކުޑަކުދިންނަށް ހާއްސަކޮށް ޕްލޭ އޭރިޔާއެއް ގާއިމްކޮށްފި

ދިރާގުން ކުޑަކުދިންނަށް ހާއްސަކޮށް އިންޑޯ ޕްލޭ އޭރިޔާއެއް އައިޖީއެމްއެޗްގެ އޯޕީޑީއަށް ވަންނަ ގޭޓް ސަރަހައްދުގައި ގާއިމްކޮށް ރަސްމީކޮށް ހުޅުވައިފި އެވެ.

މި ޕްލޭއޭރިޔާ، މިއަދު އައިޖީއެމްއެޗްގައި ބޭއްވުނު ހާއްސަ ރަސްމިއްޔާތެއްގައި ހުޅުވައިދެއްވީ ދިރާގުގެ ސީއީއޯ އަދި އެމްޑީ، އިސްމާއިލް ރަޝީދުގެ އިތުރުން އައިޖީއެމްއެޗްގެ ސީއީއޯ ބްރިގޭޑިއަރ ޖެނެރަލް ރިޓަޔާޑް ފަރްހަތު ޝަހީރެވެ

މި ޕްލޭ އޭރިޔާއަކީ ކުޑަކުދިންނަށް ހާއްސަ ކަމެއް ކުރުމުގެ ގޮތުން ހުޅުވިގެންދާ ތަނެއް ކަމަށާއި ކުޑަކުދިންނަށް އަޅާލާ އެކުދިންގެ ހައްޤުތައް ރައްކާތެރި ކުރުމަކީ ދިރާގުގެ އިޖްތިމާއީ ޒިންމާގެ ދަށުން ވަރަށް ބޮޑު އަހަންމިއްޔަތުކަމެއް ދީގެން މަސައްކަތްކުރާ ދާއިރާއެއް ކަމަށް ދިރާގުން މައުލޫމާތު ދެއެވެ.

އަދި މި ޕްލޭ އޭރިޔާގެ މަގުސަދަކީ ހޮސްޕިޓަލަށް ބަލި މީހުންނަށް ގޮވާލަން ވަޑައިގަންނަވާ ބެލެނިވެރިންނާއެކު ގިނަ އަދަދެއްގެ ކުޑަކުދިންވެސް ގޮސް އެތަނުގައި ވަގުތު ހޭދަކުރަމުންދާއިރު، ބަލި މީހުންނާއި އެންމެ ގާތް ނުވެ އެކުދިންނަށް ތިބެވޭނެ ހާއްސަ ސަރަހައްދެއް ގާއިމް ކުރުން ކަމަށް ދިރާގުން މައުލޫމާތު ދެއެވެ.

މި މިދިޔަ ޕްލޭ އޭރިޔާގެ އިތުރުން ދިރާގުން މިހާރުވެސް ދަނީ ކުޑަކުދިންނަށްޓަކައި މުހިންމު ގިނަގުނަ މަސައްކަތްތަކެއް ކުރަމުންނެވެ. އެގޮތުން ކުޑަކުދިންގެ ހިޔާއަށް 2008 ވަނަ އަހަރުން ފެށިގެން ޕޭރަންޓަލް ކޮންޓްރޯލާއިއެކު ހިލޭ އިންޓަނެޓް ފޯރުކޮށްދިނުމާއިއެކު އެތަނުގައި މަސައްކަތް ކުރައްވާ މުވައްޒަފުންވެސް ދިރާގުން ދަނީ ސްޕޮންސަރ ކުރައްވަމުންނެވެ. މީގެއިތުރުން 2013 ވަނަ އަހަރު ދިރާގުން ވަނީ ކުޑަކުދިންގެ ހިޔާގައި 2 ކޮމްޕިއުޓަރު ލެބާއި ލައިބްރަރީ ސެޓަޕެއް ޤާއިމުކޮށްފައެވެ.