ތިންވަނަ ކުއާޓަރުގެ ޖީއެސްޓީ ނުދައްކާ ފަރާތްތަކުގެ ލިސްޓުގައި ކުޅުދުއްފުށީގެ 4 ވިޔަފާރިއެއް

މިދިޔަ އަހަރުގެ ތިންވަނަ ކުއާޓަރގެ ޖީއެސްޓީ ނުދައްކާ ފަރާތްތަކުގެ ނަންތައް އާންމުކުރުމުގެ ގޮތުން މޯލްޑިވްސް އިންލެންޑް ރެވެނިއު އިން ނެރެފައިވާ ލިސްޓުގައި ކުޅުދުއްފުށީގެ ތިން ވިޔަފާރި ވެރިއެއްގެ ހަތަރު ވިޔަފާރިއެއް ހިމެނިއްޖެ އެވެ.

މީރާއިން އާއްމުކޮށްފައިވާ ލިސްޓު މިމަހުގެ 10 ވަނަ ދުވަހު އަޕްޑޭޓް ކޮށްފައިވާއިރު، އެލިސްޓުގައި ވާގޮތުން ކުޅުދުއްފުށީގައި ރަޖިސްޓްރީކޮށްފައިވާ ވިޔަފާރިތަކުގެ ތެރެއިން ޖީއެސްޓީ ނުދައްކާ ވިޔަފާރިތަކަކީ ކުޅުދުއްފުށީ ޒަމާނީގެ މުހައްމަދު ހަސަން ނަންމަތީގައި ރަޖިސްޓަރީކޮށްފައިވާ ސަހާމާ ޕެލެސް އަދި ފަތާތަށި ވިލޯ އިންވެސްމެންޓާއި ކުޅުދުއްފުށި ހުރާ ހުސެން އާދަމްގެ ނަންމަތީގައި ރަޖިސްޓަރީކޮށްފައިވާ ތައުޒަން ޕްލަސް ސަޕްލައި އެންޑް ލޮޖިސްޓިކްސް އަދި ކުޅުދުއްފުށި މިޔަރެން މަރިޔަމް އަލީގެ ނަންމަތީގައި ރަޖިސްޓަރީކޮށްފައިވާ ރިއަލް ޕޮއިންޓް ފިހާރައެވެ.

ޖުމްލަ 93 ފަރާތެއް ހިމެނޭ މި ލިސްޓުގަަައި ޓޫރިޒަމް ވިޔަފާރިކުރާ 9 ފަރާތަކާއި އެ ނޫން ދާއިރާތަކުގައި ވިޔަފާރިކުރާ 84 ފަރާތެއް ހިމެނެއެވެ.

ޖީ.އެސް.ޓީ ނުދައްކާ ފަރާތްތަކުގެ މައުލޫމާތު ހާމަކުރުމުގެ ކުރިން އެ ފަރާތްތަކަށް އެކި ފަހަރު މަތިން ފޯނުން ގުޅައި، ޓެކްސް ނުދައްކާ ފަރާތްތަކަށް ޤާނޫނުގައި ކަނޑައަޅައިފައިވާ އަދަބުތައް ކިޔައިދެވިފައިވާނެ ކަމަށާއި، އެސް.އެމް.އެސްގެ ޒަރީއާއިންނާއި އެ ތަންތަނަށް ޒިޔާރަތްކޮށްގެން ވެސް އެ ފަރާތްތަކަށް އެ ކަން އެންގުމުގެ މަސައްކަތްކޮށްފައި ވާނެ ކަމަށްވެސް މިރާގެ ބަޔާނުގައި ވެއެވެ. އަދި ލިސްޓުގައިވާ ފަރާތްތަކުގެ ތެރެއިން އެއްވެސް ފަރާތަކުން ޖީ.އެސް.ޓީ ބަޔާން ހުށަހަޅައިފިނަމަ ނުވަތަ ފައިސާ ދައްކައިފިނަމަ އެ ފަދަ ފަރާތެއްގެ ނަން އެ ލިސްޓުން އުނިކުރެވޭނެކަމަށް މީރާއިން ބުނެއެވެ.