ކުޅުދުއްފުށީ މަގު ހެދުމުގެ މަޝްރޫއު މަހެއްހާ ދުވަހުގެ ތެރޭގައި އަލުން ފަށަނީ

މެދުކެނޑިފައި އޮތް ކުޅުދުއްފުށީ މަގު ހެދުމުގެ މަސައްކަތް މަހެއްހާ ދުވަހުގެ ތެރޭގައި ފަށާނެ ކަމަށް މޯލްޑިވްސް ރޯޑް ޑިވެލޮޕްމަންޓް ކޯޕަރޭޝަން (އެމްއާރުޑީސީން) ބުނެފި އެވެ.

ދައުލަތުގެ މީޑިއާއަށް ދިން އިންޓަވިއުގައި އެމްއާރުޑީސީގެ މެނޭޖިންގ ޑިރެކްޓަރު އިބުރާހިމް ނަޒީމް ވިދާޅުވީ ކުރިއަށް އޮތް މަހެއް ދުވަހުގެ ތެރޭގައި 7 ރަށެއްގެ މަގު ހެދުމުގެ މަސައްކަތް ފަށާނެ ކަމަށެވެ. މީގެ ތެރެއިން ގިނަ ރަށްތަކުގެ މަގުތައް ހަދަނީ ތާރު އަޅައިގެންނެވެ.

މަގު ހެދުމުގެ މަސައްކަތް ފެށުމަށް ހަމަޖެހިފައިވާ 7 ރަށަކީ ހދ ކުޅުދުއްފުށި، ހދ ހަނިމާދޫ، ހއ ދިއްދޫ ، ބ އޭދަފުށި ، ރ މީދޫ ،  އުނގޫފާރު ގެ އިތުރުން އދ މަހިބަދޫއެވެ.

މީގެ ތެރެއިން އދ މަހިބަދޫ އާއި ރ މީދޫގެ މަގު ފިޔަވައި ހުރިހާ ރަށެއްގެ މަގު ހެދުމަށް ހަމަޖެހިފައިވަނީ ތާރު އަޅައިގެން ކަމަށް އެމްއާރުޑީސީން ބުނެ އެވެ. އެ ދެ ރަށުގެ މަގު ހެދުމަށް ހަމަޖެހިފައިވަނީ ގައު އަތުރައިގެން ރަނގަޅު ފެންވަރަށް ކަމަށެވެ.

މަގު ހެދުމުގެ މަސައްކަތް ކުރިއަށްދާ  ހުރިހާ ރަށެއްގައި ވެސް އެވްރެޖްކޮށް 9 ރަށުގެ މަގު ހެދުމުގެ މަސައްކަތް ކުރިއަށް ދާކަމަށް އެމްއާރުޑީސީން މައުލޫމާތުދެއެވެ. އެގޮތުން ކޮންމެ ރަށެއްގެ މަގު ހަދާ ނިމިގެންދާއިރު އާއްމުކޮށް ބޭނުންކުރާ ގިނަ މަގުތަކެއް ހެދިގެންދާނެކަމަށް ނަޒީމް ވިދާޅުވިއެވެ.

ކުޅުދުއްފުށީގެ މަގު ހެދުމުގެ މަޝްރޫއު ފަށަފައިވަނީ 2012 ވަނަ އަހަރު އެވެ. އެހެން ނަމަވެސް އެންމެ މަގެއްގައި ފިޔަވާ އިތުރު އެއްވެސް މަގެއް ހަދާފައެއް ނުވެ އެވެ. ހަމަ އެހެންމެ ހަނިމާދުގެ މަގު ހެދުމުގެ މަސައްކަތް ފަށާފައިވަނީ 2013 ވަނަ އަހަރުކަމުގައި ވީނަމަވެސް އެކި ސަބަބުތަކާ ހެދި މަގު ހެދުމުގެ މަޝްރޫއު ވަނީ ހުއްޓިފަ އެވެ.