ކުޅުދުއްފުށި، ހަނިމާދޫ، އަދި ދިއްދޫ އިން ބިން ވިއްކުމަށް ހުޅުވާލައިފި

ބިންވެރިކުރުމުގެ ދެވަނަ ބުރުގެ ދަށުން ބިން ގަތުމަށް ހުޅުވަލި ފުރުސަތުގައި ހިމެނޭ ރަށްތަކުގެ ތެރެއިން ހދ ކުޅުދުއްފުށި، ހަނިމާދޫ އަދި ހއ ދިއްދޫ ހިމެނިއްޖެ އެވެ.

އެ މަޝްރޫއުގެ ފުރަތަމަ ފިޔަވަހީގައި ވެސް ހދ ހަނިމާދޫވަނީ ހިމެނިފައެވެ.

ބިންވެރިކުރުމުގެ ޕްރޮގްރާމްގެ ދެވަނަ ބުރުގެ ދަށުން މީހުން ދިރިއުޅޭ ރަށްރަށުން ބިން މިލްކު ކުރެވޭގޮތަށް، އިގްތިސާދީ ބޭނުމަށް ބިން ގަތުމަށް ޕްރޮޕޯޒަލް ހުށަހެޅުމަށް ހައުސިން މިނިސްޓްރީން ހައުސިން މިނިސްޓްރީން ހުޅުވާލި މި ފުރުސަތުގައި ނ. ވެލިދޫ، ބ. އޭދަފުށި، ބ. ތުޅާދޫ، ކ. ތުލުސްދޫ، ދ. މީދޫ ވެސް ވަނީ ހިމެނިފަ އެވެ.

އެ ރަށްތަކުގެ އިތުރުން އެ މަޝްރޫއުގެ ފުރަތަމަ ފިޔަވަހީގައި ހިމެނެނީ ޏ. ފުވައްމުލަކާއި، އައްޑޫ ސިޓީ އެވެ. އެކަމަކު އެ ރަށްތަކުން ބިން ގަތުމުގެ ފުރުސަތު އަދި ހުޅުވައެއް ނުލަ އެވެ.

ހައުސިން މިނިސްޓްރީން ބުނީ އާމްދަނީ ލިބޭނެ ވަސީލަތެއްގެ ގޮތުގައި ވިޔަފާރި އުސޫލުން ރަށްރަށުން ބިން ބޭނުންކުރަން ޝައުގުވެރިވާ ފަރާތްތަކުން އަންނަ މަހުގެ 15ގެ ކުރިން ހުށަހަޅަން ޖެހޭ ކަމަށެވެ.

މި ބިން ތަކަކީ އިގްތިސޯދީ ބޭނުންތަކަށް އަތޮޅު ތެރޭގެ ރަށްތަކުން ބިން ދޫކުރެވޭ ގޮތަށް ބިމާ ގުޅޭ ގާނޫނު އިސްލާހު ކޮށްފައިވާތީ އެ ގާނޫނުގެ ދަށުން “މިނިސްޓްރީތަކާ ހަވާލު ކުރެވޭ ބިންތައް ވިޔަފާރި އުސޫލުން މުއާމަލާތް ކުރުމާބެހޭ ގަވާއިދު”ގެ ދަށުން ރާއްޖޭގެ އެކި ރަށްރަށުން ކުއްޔަށް ބިން ދޫކުރުމުގެ ދަށުން ދޫ ކުރާ ބިންތަކެކެވެ.

ބިންތަކާބެހޭ މައުލޫމާތާއި ޕްރޮޕޯޒަލް ހުށަހަޅަންވީގޮތާއި އެކަމަށް ތައްޔާރުކުރެވިފައިވާ ފޯމާއި، އަދި އެނޫންވެސް އިތުރު މައުލޫމާތު އެ މިނިސްޓްރީގެ ވެބްސައިޓުން ލިބެން ހުންނާނެ ކަމަށް އެމިނިސްޓްރިން މައުލޫމާތު ދެއެވެ.