ގެއްލުނު އަބްދުއްރަޝީދު އަލީ އަދިވެސް ނުފެނޭ، ހޯދުމުގެ މަސައްކަތް ދަނީ ކުރިޔަށް – އެމް.އެން.ޑީ.އެފް

އިއްޔެ ފަތިހުގެ ވަގުތެއްގައި ގއ. ކޫއްޑޫ ކައިރި ފުއްޓަރު ފަރާތަށް ލަނޑާ ނަގަން އެރި އުޅުނު ދެ މީހުންގެ ތެރެއިން ގެއްލިގެންގެން ހޯދަމުންދާ އަބްދުއްރަޝީދު އަލީ އަދިވެސް ނުފެއްނަކަމަށް އެމް.އެން.ޑީ އެފުން ބުނެފިއެވެ.

ހދ ކުޅުދުއްފުށި ބޮޑުދުނބުރިގެ، އަބްދުއްރަޝީދު އަލީ ގެއްލިގެން ހޯދަމުންދާތާ 24 ގަޑިއިރަށް ވުރެ ގިނަ އިރު ވެފައިވާއިރު އޭނާ ހޯދުމަށް ކަނޑާ، ވައިގެ މަގުން އަދި ފީނައިގެން ކުރި މަސައްކަތް އިއްޔެ އިރުއޮއްސުމާއިއެކު ވަގުތީ ގޮތުން މެދުކަނޑާލުމަށްފަހު، މިއަދު ހެނދުނު ހަޔެއް ޖެހިއިރު އަލުންވަނީ ފަށާފައެވެ.

އެގޮތުން އަބްދުއްރަޝީދު ހޯދުމަށް މިއަދު ހަޔެއް ޖެހިއިރު އެމް.އެން.ޑީ.އެފްގެ ކަނޑުގެ އުޅަނދު ނޫރައްދީން މަސައްކަތުގައި ހަރަކާތްތެރިވާން ފަށާފައިވެއެވެ. އަދި އަށްގަޑި ތިރީހުން ފެށިގެން ފީނައިގެން އޭނާ ހޯދުމަށް މަސައްކަތް ފަށާފައިވާކަމަށްވެސް އެމް.އެން.ޑީ.އެފުން މަޢުލޫމާތުދެއެެވެ.

ފީނައިގެން އޭނާ ހޯދުމަށް ކުރަމުންދާ މަސައްކަތުގައި ޑައިވަރުންގެ ދެ ޓީމެއް ހަރަކާތްތެރިވަމުންދާއިރު، މި ޓީމްގައި “ރެސިޑެންސް މޯލްޑިވްސް”ގެ ދެ ޑައިވަރުންވެސް ދަނީ ހަރަކާތްތެރިވަމުންނެވެ.

އޭނާ ހޯދުމުގެ މަސައްކަތުގައި އިއްޔެ ދެ ފަހަރެއްގެ މަތިން ފީނާފައިވާކަމަށާއި އެ މަސައްކަތުގެ ތެރެއިން އެ ސަރަހައްދުގައި އުޅުނު “މޯލްޑިވިއަން ޕްރިންސަސް” ކިޔާ ސަފާރީއެއްގެ ޑައިވަރުންގެ އެހީތެރިކަން ލިބިފައިވާކަމަށްވެސް އެމް.އެން.ޑީ.އެފުން ބުނެއެވެ.

އަބްދުއްރަޝީދު އަލީ އާއެކު ލަނޑާނެގުމަށް ހަރަކާތްތެރިވި މީހާ ބުނިގޮތުގައި ރޭ ފަތިހު މޫދަށް ފޭބުމަށްފަހު އޭނާ މިސްރާބު ޖަހާފައިވަނީ ގއ ވިލިގިއްޔާ ދިމާއަށެވެ. އަދި އޭނާ ގެއްލުނު އިރު ލައިގެން ހުރީ ކަޅުކުލައިގެ ސްވިމް ސޫޓެއް ކަމަށާއި އަރައިގެން ހުރީ ފެހިކުލައިގެ ފިންސަކަށް ކަމަށް ފުލުހުން ބުނެއެވެ.

އަބުދުއް ރަޝީދު އަލީ ގެއްލިފައިވާ ސަރަހައްދުން ދަތުރު ކުރާ ފަރާތްތަކުން މިކަމަށް ސަމާލުވެ، އޭނާއާ ބެހޭ އެއްވެސް މައުލޫމާތެއް ލިބިވަޑައިގެންފި ނަމަ ކޯސްޓް ގާޑަށް ނުވަތަ ފުލުހުންނާ ހިއްސާ ކުރުމަށް އެފަރާތުން އެދިލައްވައެވެ.