ކުޅުދުއްފުއްޓަށް މަސްތުވާ ތަކެތި އެތެރެކުރި މީހަކު 10 އަހަރަށް ޖަލަށް ލުމަށް ހުކުމްކޮށްފި

ކުޅުދުއްފުއްޓަށް މަސްތުވާ ތަކެތި އެތެރެ ކުރި މީހަކު 10 އަހަރަށް ޖަލަށް ލުމަށް ހުކުމްކޮށްފި އެވެ.

ކުޅުދުއްފުށީ މެޖިސްޓްރޭޓް ކޯޓުން އިއްޔެ ކުރިި ހުކުމްގައި ބުނީ، ކުޅުދުއްފުށި ތާޖު އަހުމަދު ސަބާހު،(29އ)، 2014 ވަނަ އަހަރުގެ އެޕްރީލް މަހު ކުޅުދުއްފުއްޓަށް 0.6204 ގްރާމުގެ މަސްތުވާ ތަކެތި އެތެރެކުރިކަން ސާބިތުވާ ކަމަށެވެ.

މީގެ އިތުރުން އެ ކުށުގެ އުގޫބާތެއްގެ ގޮތުން 10 އަހަރުގެ މުއްދަތަށް ޖަލަށް ލުމާއެކު 50000ރ އިން ޖޫރިމަނާކޮށް، އެ ފައިސާ ތިން މަސްދުވަސްތެރޭގައި ކޯޓަށް ދައްކާ ހަލާސްކުރުމަށްެ ކުޅުދުއްފުށީ ކޯޓުން ކުރި ހުކުމްގައި އަހުމަދު ސަބާހުގެ މައްޗަށް އަންގާފައިވެއެވެ.

އެ ކޯޓުގެ ހުކުމްގައި ބުނީ ސަބާހު މަސްތުވާ ތަކެތި ބޭނުންކޮށް، އެ ތަކެތި ގެންގުޅުނު ކަމަށް ފުލުހުންނަށް ލިބުނު މައުލޫމާތަކާ ގުޅިގެން 21 އެޕްރީލް 2014 ވަނަ ދުވަހު ފުލުހުން ހިންގި ހާއްސަ އޮޕަރޭޝަނެއްގައި، ސަބާހު ނޮޅިވަރަމުން ކުޅުދުއްފުއްޓަށް ދިޔަ ފެރީއަކުން މަސްތުވާ ތަކެތި އެތެރެ ކުރިކަން ހޯދިފައިވާ ކަމަށެވެ.