ނޮޅިވަރަމް ކައުންސިލުގެ ރައީސްކަމަށް އަބުދުﷲ ޝަރީފް އިންތިހާބުކޮށްފި

ހުސްވެފައިވާ ހދ ނޮޅިވަރަމް ކައުންސިލްގެ ރައީސްގެ މަގާމަށް އެކައުންސިލްގެ ކުރީގެ ނައިބު ރައީސް އަބުދުﷲ ޝަރީފް އިންތިހާބު ކުރައްވައިފި އެވެ.

މިއަދު ރައީސަކު ކަނޑައެޅުމަށް ނޮޅިވަރަމް ކައުންސިލްގެ ބޭއްވި ޖަލްސާގައި އަބުދުﷲ ޝަރީފް ރައީސް ކަމަށް ކުރިމަތިލެއްވީ ނައިބް ރައީސް ކަމުން އިސްތިއުފާ ދެއްވުމަށްފަހު އެވެ. އޭނާ އެކު ދެން އެމާގަމަށް ކުރިމަތިލެއްވީ ޖުމްހޫރީ ޕާޓީގެ ކައުންސިލަރު އިބުރާހިމް ރަޝީދެވެ.

އެމްޑީޕީއަށް ނިސްބަތްވެއްލަވައި އަބުދުﷲ ޝަރީފަށް 3 ވޯޓް ލިބިލެއްވިއިރު  އިބުރާހިމް ރަޝީދަށް ލިބިލެއްވީ އެންމެ ބޯޓެކެވެ. 1 ވޯޓް ގުނާފައިވަނީ ބާތިލް ވޯޓެއްގެ ގޮތުގަ އެވެ.

ކުރިން ނޮޅިވަރަމް ކައުންސިލްގެ ރައީސްގެ މަގާމުގައި ހުންނެވީ އެކައުންސިލުގައ ި އިންނަވާ ހަމައެކަނި ޕީޕީއެމް އަދި އަންހެން މެމްބަރު މަރިޔަމް ހަބީބެވެ. އޭނާ އިސްތިއުފާ ދެއްވީ މިމަހު އެއްވަނަ ދުވަހު އެވެ.

މަރިޔަމް ހަބީބް ކައުންސިލްގެ ރައީސާގެ މަގާމުން އިސްތިއުފާ ދެއްވީ  ކައުންސިލް މެންބަރުންގެ އެއްބާރުލުން އެއްވެސް ކަމެއްގައި ނުލިބޭތީ ކަމަށެވެ.

ނޮޅިވަރަމް ކައުންސިލުގައި ތިއްބަވަނީ 5 މެމްބަރުންނެވެ. އެއީ އެމްޑީޕީގެ 2 ކައުންސިލަރަކާއި ޖޭޕީގެ 2 ކައުންސިލަރެއްގެ އިތުރުން ޕީޕީއެމް ކައުންސިލަރެކެވެ.