ފުރަތަމަ ފަހަރަށް މޯލްޑިވް ގޭހުގެ އަގު ހެޔޮކުރަނީ

އަންނަ އޭޕްރިލް މަހުން ފެށިގެން، މޯލްޑިވް ގޭހުން ވިއްކާ 10 ކިލޯގެ ގޭސްފުޅީގެ އަގު ހެޔޮކުރުމަށް އެކުންފުނިން ނިންމައިފިއެވެ.

މޯލްޑިވް ގޭހުގެ ފަރާތުން މިއަދު ބޭއްވި ނޫސްވެރިންގެ ބައްދަލުވުމެއްގައި އެކުންފުނީގެ މެނޭޖިން ޑިރެކްޓަރު ޢަބުދުﷲ މައުމޫން ވިދާޅުވީ، 10 ކިލޯގެ ގޭސްފުޅިއަކުން 15 ރުފިޔާ އަގު ހެޔޮކުރުމަށް ނިންމާފައި ވާކަމަށެވެ.

އެކުންފުނިން މިހާރު ދިހަކިލޯގެ ގޭސްފުޅިއެއް ވިއްކަމުންގެންދަނީ 225 ރުފިޔާއަށެވެ. އަދި އެޕްރިލް އެއްވަނަ ދުވަހުންފެށިގެން ގެންނަ ބަދަލާއިއެކު ދެން ގޭސްފުޅިއެއް ވިއްކާނީ 210 ރުފިޔާއަށް ކަމަށް މައުމޫން ވިދާޅުވިއެވެ.

މި ބަދަލު މާލޭގެ އިތުރުން އަތޮޅު ތެރޭގައި އެކުންފުނީގެ ގޭސް ވިއްކާ ފަރާތްތަކުންވެސް އޭޕްރީލް މަހުން ފެށިގެން ގެންނަން ޖެހޭނެ ކަމަށް އެކުންފުނިން މަޢުލޫމާތުދެއެވެ.

މިއީ މޯލްޑިވް ގޭހުން ވިއްކާ ގޭހުގެ އަގު ކުޑަކުރާ ފުރަތަމަ ފަހަރެވެ. މީގެ ކުރިން އެކުންފުނިން ގޭހުގެ އަގަށް ބަދަލު ގެނައި 2008 ވަނަ އަހަރާއި 2011 ވަނަ އަހަރުވެސް، ގޭހުގެ އަގު ކޮށްފައި ވަނީ ބޮޑެވެ.