ކުޑަ ފިރިހެން ކުއްޖަކާ ޖިންސީ ގޯނާކުރި ކުޅުދުއްފުށީ މީހަކު 15 އަހަރަށް ޖަލަށްލުމަށް ހދ. ކުޅުދުއްފުށީ ކޯޓުން ހުކުމް ކޮށްފި އެވެ.
ޖިންސީ ގޯނާ ކުރި ކަމުގެ ކުށް ސާބިތުވެ ޖަލަށް ލުމަށް ހުކުމް ކޮށްފައިވަނީ ކުޅުދުއްފުށީ އިރުޒުވާގެ އަހުމަދު އިބްރާހީމްގެ މައްޗަށެވެ.
އޭނާގެ މައްޗަށް މި ހުކުމް އިއްވާފައިވަނީ ސްކޫލެއްގައި ކިޔެވި ކުއްޖަކަށް އެކި ފަހަރު މަތިން ޖިންސީ އަމަލު ހިންގި ކަން ޝަރީއަތަށް ސާބިތުވުމުންނެވެ. މައުލޫމާތު ލިބިފައިވާގޮތުގައި އެ ކުއްޖާއަށް ޖިންސީ ގޯނާކޮށްފައި ވަނީ ގްރޭޑް ދޭކުން ފެށިގެން، ގްރޭޑް ހަތަކާ ހަމައަށް އެ ކުއްޖާ ކިޔެވި ދުވަސްވަރުގަ އެވެ.
އިތުބާރުކުރެވޭ މަގާމެއްގައި ހުރެ ކުޑަކުއްޖަކާ މެދު ޖިންސީ އަމަލު ހިންގުމުގެ ކުށުގެ ދައުވާ އަށް އަހްމަދު އިބްރާހީމް އިންކާރުކުރި ނަމަވެސް ޝަރީއަތަށް ހުށަހެޅިފައިވާ ހެކިތަކުން އޭނާގެ މައްޗަށް އެ ކުށް ސާބިތުވާ ކަމަށް ކޯޓުން ކުރި ހުކުމްގައި ވެއެވެ.
އަހުމަދު އިބްރާހީމްގެ މައްޗަށް އެ ހުކުމް އިއްވާފައި ވަނީ ކުޑަކުދިންނަށް ޖިންސީ ގޯނާ ކުރާ މީހުންނާ މެދު ޚާއްސަ އުސޫލުތަކަކަށް އަމަލުކުރުމުގެ ގާނޫނުގެ ނުވަ ވަނަ މާއްދާގެ (ހ)އާ ހަވާލާދީ އެ މާއްދާގެ (ށ) ގެ ދަށުންނެވެ.
