އޭޑީކޭއިން ފޯކައިދޫގައި އަޅާ ހޮސްޕިޓަލް: ސިއްހީ ގޮތުން ސަރަހައްދަށް އަންނަ ބޮޑު ފަސޭހައެއް

ށ. ފޯކައިދޫ އަކީ 1171 މީހުންގެ އާބާދީއެއް އޮންނަަ ބިން ބޮޑު ރަށެކެވެ. އެ ރަށުގެ ރައްޔިތުންވެސް ސިއްހީ ފަރުވާއަކަށް ޖެހިއްޖެ ހާލަތެއްގައި ކަންތައް ކުރަން އޮންނަނީ ރައްޖޭގެ އަތޮޅުތަކުގައި އެހެން މީހުންނަށްވެސް އޮތް ހަމައެކަނި ގޮތެށެވެ. އެއީ އާދައިގެ ހިދުމަތްތައް ވެސް ފުރިހަމައަށް ލިބެން ހުންނަ ހަމައެކަނި ހޮސްޕިޓާތައް ހުންނަ މާލެއަށް ގޮސް ފަރުވާ ހޯދުމެވެ. އެހެން ކަމުން އެކަމަށް ހައްލު ހޯދުމަށް އޭޑީކޭ ކުންފުނިން މިހާރު ވަނީ ފޯކައިދޫގައި މާލޭގެ އޭޑީކޭ ހޮސްޕިޓަލާ އެއްފަދަ ހިދުމަތްތައް ލިބޭނެ ހޮސްޕިޓަލެއް އެޅުމަށް ނިންމާފައެވެ.

މާލެ ފިޔަވައި ރާއްޖެތެރޭ ރަށެއްގައި ގިނަ ހިދުމަތްތަކެއް ލިބޭނެ ހޮސްޕިޓަލެއް އަޅާ މިއީ ފުރަތަމަ ފަހަރެވެ. އަދި އޭޑީކޭ އިން ވެސް މާލެ ފިޔަވައި ރާއްޖެތެރޭގެ ރަށެއްގައި ހޮސްޕިޓަލެއް އަޅާ މިއީ ފުރަތަމަ ފަހަރުވެސް މެއެވެ. ހަމަގައިމުންވެސް އެ ރަށާއި އަދި އަތޮޅުގެ ރަށްތަކުގައި ދިރިއުޅޭ ރައްޔިތުންނަށް މިއީ އުފާވެރި ހަބަރަކަށް ވާނެއެވެ. އެހެނީ ރާއްޖޭގައި ސިއްހީފަރުވާ ހޯދަން ޖެހިއްޖެ ހާލަތެއްގައި މާލެ އައުން ފިޔަވައި އެހެން ގޮތެއް ރާއްޖެތެރެ މީހަކަށް ނޯންނާތީއެވެ. ސިއްހީ ފަރުވާގެ ހަރަދުތަކުގެ އިތުރުން މާލޭގައި ކޮޓަރި ކުލި އަދި ކެއުމަށް ހަރަދު ކުރަމުން ރާއްޖެތެރޭ މީހަކަށް މާލޭގައި ހުރުމަކީ ފަސޭހަކަމެއް ނޫނެވެ.

ފޯކައިދޫގައި އަޅަން ހަމަޖެހިގެން ދިޔަ ހޮސްޕިޓަލުގައި މާލޭގެ އޭޑީކޭ ހޮސްޕިޓަލެކޭ އެއްފަދަ ހިދުމަތްތައް ލިބޭނެކަމުގެ ޔަގީންކަން އެ ކުންފުނިން ދެއެވެ. އެހެން ކަމަށްވާނަމަ އަތޮޅުތެރޭގެ ސިއްހީ މަރުކަޒުތަކާއި ހޮސްޕިޓަލުން ދެވެން ނެތް ފަރުވާތައް ގުރޭޓާ މާލެ ސަރަހައްދަށް ގޮސް ކުލީގެ އަޅަކަށް ނުވެ ފަރުވާ ލިބުމަށް މަގުފަހި ވެގެން ދިޔުމީ ރަށްފުށު ރައްޔިތުންނަށް ލިބިގެން ދާނެ ބޮޑު ލުޔެއް ކަން ހަމަގައިމުންވެސް ޝައްކެއް ނެތެވެ.

ހަމައެއާއެކު އެފަދަ ހޮސްޕިޓަލެއް ރަށުގައި ގާއިމު ވެގެން ދިޔުމުން ވަޒީފާއެއް ނެތިފައިތިބި ޒުވާނުންނަށްވެސް ހުޅުވާލެވުނީ އެކަމަށް ދޮރެކެވެ. އަދި އެ ރަށަށް ވަންނަ އާމްދަނީވެސް ހޮސްޕިޓަލުގެ ސަބަބުން އިތުރުވެގެންދާނެ އެވެ.

އޭޑީކޭ ކުންފުނިން މިފަދަ އަގުހުރި މަޝްރޫއެއް ފަށާފައިވާއިރު ބޭނުން ވަނީ ސަރުކާރުންވެސް އަތޮޅުތަކުގެ ތެރޭގައި މިފަދަ އިތުރު މަޝްރޫއުތައް އަމަލީގޮތުން ފައްޓަވާދެއްވާތަން ދެކިލުމެވެ. މާލެ ގިރިޓީކުރުމުގެ ހިޔާލު ދޫކޮށް ރާއްޖެތެރޭގައި ދިރިއުޅޭ ރައްޔިތުންނަށް އިންސާފުވެރި ތަރައްގީގެ ހަގީގީ ކުލަތައް ދެއްކުމެވެ. ސިއްހީ މަރުކަޒުތަކާއި އަތޮޅު ހޮސްޕިޓަލުތަކުގެ އިތުރުން ރީޖަނަލް ހޮސްޕިޓަލުތަކަށް ފެންވަރު ރަނގަޅު ޑޮކްޓަރުންނާއި ވަސީލަތްތައް ހަމައަށް ފޯރުކޮށްދިނުމެވެ.