ދުނިޔޭގެ އެކި ސްކައުޓް ކޭމްޕްތަކުގައި ބައިވެރިވެ ސްކޫލަށް ރީތީ ނަން ހޯދައިދިނުމަށް ގޮވާލަން: މަހުދީ

Mar 18, 2016

ދުނިޔޭގެ ފެންވަރުގައި ބާއްވާ ސްކައުޓް ކޭމްޕްތަކުގައި ބައިވެރިވެ ސްކޫލަށް ރީތި ނަމާ ޝަރަފް ހޯދައިދިނުމަށް ޖަލާލުއްދީން ސްކޫލުގެ ޕްރިންސިޕަލް މަހުދީ ޝާހިދު އެސްކޫލުގެ ސްކައުޓުންގެ ކިބައިން އެދިލައްވައިފި އެވެ.

ޖަލާލުއްދީން ސްކޫލުގެ ފުރަތަމަ ސްކައުޓް ކޭމްޕް ފެށުމުގެ ރަސްމިއްޔާތުގައި ވާހަކަ ދައްކަވަމުން މަހުދީ ވިދާޅުވީ މިއަދަކީ ސްކޫލުގެ ނަން ރަން އަކުރުން ފެށިގެންދާނެ ދުވަހެއް ކަމަށެވެ. އަދި މިފަދަ ހަރަކާތެއް ޖަލާލުއްދީން ސްކޫލުގައި ފެށޭނެ ގޮތެއް ނެތި 18 އަހަރުފާއިތުވެ ދިއުމަށް ފަހު، މިއަދު ސްކޫލުގައި ސްކައުޓް ފެށިފައި ވުމަކީ ފަހުރުވެރިވާން ޖެހޭ ކަމެއް ކަމަށެވެ.

މިފަދަ ހަރަކާތެއް ފެށޭނެ ގޮތެއް ނެތި އެތައް ޒަމާނެއްވެފައިވާ ވަނިކޮށް މިފަދަ ކަމެއް ފެށުމުން އުއްމީދުކުރަންވާނީ މުސްތަގުބަލުގައި ސްކައުޓުންގެ ހަރަކާތްތައް ރާއްޖޭ ފަހަނަ އަޅައި ގެންދިއުން ކަމަށާއި މަސައްކަތް ކުރަންވީ ކުރިއަށް އޮތްތާ ދުނިޔޭގެ ސްކައުންޓް ކޭމްޕުތަކުގައި ބައިވެރިވެ މަތީ ވަނަތައް ހާސިލުކުރުންކަމަށް މަހުދީ ވިދާޅުވި އެވެ

” އަޅުގަނޑުގެ އުއްމީދަކީ މުސްތަގުބަލުގައި ޖަލާލުއްދީން ސްކޫލުގެ ސްކައުޓްގެ ހަރަކާތް ހަމައެކަނި ދިވެހި ރާއްޖެއަކަށް ނޫން. ދުނިޔެއަށް ވެސް ޖަލާލުއްދީން ސްކޫލުގެ ނަން ގެންދިއުން. މިހާރު ދުނިޔޭގެ އެކިއެކި ސްކައުޓް ކޭމްޕްތަކުގައި ސްކައުޓް ކުދިން ވަރަށް މަތީ ކާމިޔާބީތައް ހޯދަމުން އެދަނީ ހަމަ ދިވެހި ސްކައުންޓް. އެހެން ނަމަވެސް މިހުރިހާ ފުރުސަތުތައް އެތައް ޒަމާނެއް ވަންދެން ރާއްޖޭގެ އެކި ސްކޫލުތަކުން ހޯދަމުން ދިޔައިރު ޖަލާލުއްދީން ސްކޫލަށް މި ފުރުސަތު ވަނީ ނުލިބިފަ. މިއީ ހިތާމަކުރަން ޖެހޭ ކަމެއް. އެހެންނަމަވެސް މިހާރު އާ އަޒުމާއެކު އަޅުގަނދުމެން މަސައްކަތްކުރަންވީ ކުރިއަށް އޮތްތާގައި ޖަލާލުއްދީން ސްކޫލުގެ ކުދިން ދުނިޔޭގެ އެކި ސްކައުޓް ކޭމްޕްތަކުގައި ބައިވެރިވެ މަތީ ވަނަތައް ހާސިލްކުރުން. ” ޕްރިންސިޕަލް މަހުދީ ވިދާޅުވި އެވެ.

މިއަދު އަދި މިއުއްމީދު ހާސިލް ނުވި ނަމަވެސް ތިޔަކުދިން މަސައްކަތް ކުރަންވާނީ އަންނަ އޮތް ޖީލަށް އެކަންތައް ފަހިކޮށްދީގެން، ރީތި ނަން ހާސިލުކުރުމަށް ކަމަށް އޭނާ ވިދާޅުވި އެވެ. އަދި ސްކޫލުން މަސައްކަތް ކުރާނީ ލިބެން ހުރި ފުރުސަތުތައް ދަރިވަރުންނަށް ހޯދައިދިނުމަށްކަމަށް މަހުދީ ވިދާޅުވި އެވެ.

” އަޅުގަނޑުމެން ކިތަންމެއް ރަށްފުށުގައި ތިބި ނަމަވެސް ކަނޑު ހުރަސްކޮށް އެހެން ތަންތަނަށް ގެންގޮސް އަޑުއުފުލަށް ޖެހޭ ފަހުރުވެރިކަމާ އެކީގައި ތިމަންނާ އަކީ ޖަލާލުއްދީން ސްކޫލުގެ ދަރިވަރެކޭ ބުނެވޭ ވަރު ތަނަކަށް ޖަލާލުއްދީން ހެދުމަށް ސްކޫލުގެ ސްކައުންޓުން ވެސް މިންނަތާ އެކީގައި މަސައްކަތް ކުރުމަށް. މިއީ އަޅުގަނޑުގެ އެދުމެއް. ” މަހުދީ ވިދާޅުވި އެވެ.

މިލިޔުމާއި ގުޅޭ