ށ އަތޮޅު ގުރުއާން މުބާރާތް ކަނޑިތީމުގައި ފަށައިފި

ށ އަތޮޅު ގުރުއާން މުބާރާތުގެ ކިޔެވުން 142 ދަރިވަރުންނާ އެކު އެއަތޮޅު ކަނޑިތީމުގައި ރޭ ފަށައިފި އެވެ.

ކަނޑިތީމް ސްކޫލު ހޯލްގައި ކުރިއަށްދާ މިމުބާރާތުގައި 12 ސްކޫލަކުން ބައިވެރިވެފައިވެ އެވެ. މި މުބާރާތުގެ ފަނޑިޔާރުކަން ކުރައްވަނީ އަލްގާރީ އިބްރާހިމް ޝިފާއު އާއި އަލްގާރީ އަހުމަދު ހާޝިމް އަދި އަލްގާރީ މުހައްމަދު ވަހީދެވެ.

މިމުބާރާތް ފެށުމުގެ ގޮތުން ކަނޑިތީމު ކައުންސިލްގެ ނާއިބު ރައީސް ވާހަކަދެއްކެވި އެވެ.

މި މުބާރާތުގައި ބައިވެރިވި ސްކޫލުތަކަކީ ށ.އަތޮޅު މަދަރުސާ އާއި ގޮއިދޫ ސްކޫލާއި ފޭދޫ ސްކޫލާއި ފީވަކު ސްކޫލާއި ބިލެތްފަހީ ސްކޫލާއި ފޯކައިދޫ ސްކޫލާއި މަރޮށި އަލްމަދަރުސަތުލް މުނައްވަރާ އާއި ޅައިމަގު ސްކޫލާއި ށ.އަތޮޅު ތައުލީމީ މަރުކަޒާއި ށ.މާއުނގޫދޫ ސްކޫލާއި ށ.ފުނަދޫ ސްކޫލާއި ށ.މިލަންދޫ ސްކޫލެވެ.

މި މުބާރާތް ބޭއްވުމުގެ މަގަސަދަކީ ށ.އަތޮޅުގެ ދަރިވަރުންނަށް ކީރިތި ޤުރުއާން ތަޖުވީދުގެ ހަމަތަކުން އުނގެނުމާއި، އުނގަންނައިދިނުމުގަޔާއި، ތަރުތީލުކޮށް ކިޔެވުމުގެ ޤާބިލުކަން ދެއްކުމުގައި ވާދަވެރި މާހައުލެއް އުފެއްދުމާއި، އަތޮޅު ރައްޔިތުންގެ ހިތްތަކުގައި ކީރިތި ޤުރުއާނަށް ލޯބިޖެއްސުމާއި،ޤުރުއާން ކިޔެވުމުގެ ފަންނު އާލާކޮށް ދިރުވައި ފެތުރުމަށް މަސައްކަތްކުރުމާއި، ޤައުމީ ފެންވަރުގެ މުބާރާތްތަކުގައި އަތޮޅު ތަމްސީލުކުރުމުގެ ފުރުސަތު ތަނަވަސްކޮށްދިނުން ކަމަށް އަތޮޅު ކައުންސިލުން މައުލޫމާތުދެ އެވެ.