ރާއްޖޭގެ ފިނިހޫނުމިން 40 ޑިގްރީއަށް މައްޗަށް ނުދާނެ: މެޓް އޮފީސް

ރާއްޖޭގެ ފިނިހޫނުމިން 40 ޑިގްރީއަށް މައްޗަށް ދާނެ ކަމަށް ލަފާ ނުކުރެވޭ ކަމަށް ރާއްޖޭގެ މޫސުމާ ބެހޭ ގައުމީ އިދާރާއިން ބުނެފިއެވެ.

ޕީއެސްއެމް އަށް ދިން އިންޓަވިއުއެއްގައި އެ އިދާރާގެ ޑެޕިއުޓީ ޑިރެކްޓަރ ޖެނެރަލް، ޢަލީ ޝަރީފް ވިދާޅުވީ މާޗް މަހާއި ޖޫން މަހާ ދެމެދު އަންނަ ދުވަސްތަކަކީ އަބަދުވެސް ހޫނުވާ މިންވަރު އިތުރު ދުވަސްތަކެއް ކަމަށާއި، އެހެން ނަަމަވެސް، ސާޅީސް ޑިގްރީއަށްވުރެ މައްޗަށް ދާނެ ކަމަށް ލަފާ ނުކުރެވޭ ކަމަށެވެ. އަދި ރާއްޖޭގައި މިހާތަނަށް އެންމެ މައްޗަށް ފިނިހޫނު މިން ރިކޯޑްކުރެވިފައި 1996 ވަނަ އަހަރު ލ.ކައްދޫއަށް 36 ޑިގްރީ ސެލްސިއަސް އަށް ކަމަށް އަލީ ޝަރީފް ވިދާޅުވިއެވެ.

ރާއްޖޭގެ ފިނި ހޫނުމިން މައްޗަށް ދާނެ ކަމަށްބުނެ އާންމު ކަންބޮޑުވާފަދަ ގޮތަކަށް ސޯޝަލް މީޑިޔާއާއި، ބައެއް މީޑިޔާ ތަކުގައި ރިޕޯޓް ކުރަމުންދާ ހަބަރާކީ އެއްވެސް ހަގީގަތެއް ނެތް ވާހަކައެއް ކަމަށް އެއިދާރާއިން ހާމަކުރެއެވެ. އަދި އެ ހަބަރުތަކާ ގުޅިގެން ރައްޔިތުންނަށް އޮޅުން އަރާނަަމަ މެޓް އޮފީހަށް ގުޅުއްވުމަށްވެސް އެ އިދާރާއިން އެދިލައްވައެވެ.

ރާއްޖޭގައި ހޫނު ދުވަސްވަރު އާންމުކޮށް އެންމެ މައްޗަށް ރެކޯޑް ކުރެވެނީ އެވްރެޖްކޮށް، 33 އާއި 34 ޑިގްރީ ސެލްސިއަސް އަށެވެ.