މަޑިވަރުގައި ކުރިއަށްގެންދާ ކެޑޭޓް ކޭމްޕްގައި ކުޅުދުއްފުށީ ސްކޫލުތަކުން 9 ކުއްޖަކު ބައިވެއްޖެ

އެމްއެންޑީއެފުން އުތުރުގެ އަތޮޅުތަކަށް އަމާޒުކޮށްގެން ޅ މަޑިވަރުގައި ކުރިއަށްގެންދާ ރީޖަނަލް ކެޑޭޓް ކޭމްޕްގައި ކުޅުދުއްފުށީގެ ދެ ސްކޫލެއްގެ 9 ކެޑޭޓަކު ބައިވެރިވެއްޖެ އެވެ.

ޖަލާލުއްދީން ސްކޫލުގެ 5 ކެޑޭޓަކާއި އަފީފުއްދީން ސްކޫލުގެ 4 ކެޑޭޓަކާއި ހއ އަތޮޅު މަދަރުސާ (ހޯރަފުށީ) ސްކޫލުގެ 5 ކެޑޭޓަކުވެސް ވަނީ ބައިވެރިވެފަ އެވެ. މީގެ އިތުރުން ހއ އިހަވަންދޫ ސްކޫލާއި ށ ފުނަދޫ ސްކޫލާއި ރ އުނގުފާރު ސްކޫލު، ބ ތުޅާދޫ ސްކޫލު، ޅ ނައިފަރު މަދަރުސަތުލް އިފްތިތާހް އަދި ޅ އަތޮޅު މަދަރުސާ (ކުރެންދޫ) ސްކޫލުގެ ކެޑޭޓުން ބައިވެރިވެ އެވެ.

މި ކެޑޭޓު ކޭމްޕު ފެށުމުގެ ގޮތުން މިއަދު އެމްއެންޑީއެފް ނޮދަން އޭރިއާ ހެޑްކްއޯޓަރޒް، ޅ.މަޑިވަރުގައި ބޭއްވި ރަސްމިއްޔާތު ޝަރަފުވެރިކޮށްދެއްވީ އެމްއެންޑީއެފް ނޮދަން އޭރިއާގެ ކޮމާންޑަރ، ކާނަލް މުޙައްމަދު ޝާހިދުއެވެ.

 

އަފީފުއްދީން ސްކޫލުން ކެޑޭޓް ކޭމްޕަށް ދިޔަ ދަރިވަރުން އެސްކޫލުގެ ޕްރިންސިޕަލް ނާސިހާ އެކު

އެމްއެންޑީއެފް ނޮދަން އޭރިއާ އާއި މޯލްޑިވްސް ނޭޝަނަލް ކެޑޭޓް ކޯރ (އެމްއެންސީސީ) ގުޅިގެން ކުރިއަށްގެންދާ މި ކެޑޭޓް ކޭމްޕުގައި، އުތުރުގެ އަތޮޅުތަކަށް ނިސްބަތްވާ 9 ސްކޫލަކުން 40 ދަރިވަރުން ވަނީ ބައިވެރިވެފައެވެ.

އިސްލާމްދީނާއި ދިވެހިރާއްޖެ ދެކެ ލޯބިވާ، މައިންބަފައިންނާއި ދޮށީ މީހުންނަށް އިޙްތިރާމް ކުރާ، ދުނިޔަކީ ކަންތައްތަކަށް ލޯ ހުޅުވިފައިވާ، ތެދުވެރި، ވަފާތެރި އަދި މުރާލި ކެޑޭޓަކަށް ހެދުމަށް ބާރު އެޅުމުގެ މަޤްޞަދުގައި ކުރިއަށްގެންދާ މި ކެޑޭޓު ކޭމްޕު މިއަދުން ފެށިގެން މިމަހުގެ 26 ވަނަ ދުވަހުގެ ނިޔަލަށް ކުރިއަށްދާނެއެވެ. މިގޮތުން މި ކެޑޭޓުގެ ތަމްރީނުތައް މަޑިވަރުގައާއި ޅ.މާފިލާފުށީގައި ކުރިއަށްގެންދާގޮތަށް ވަނީ ހަމަޖެހިފައެވެ.

މި ކެޑޭޓު ކޭމްޕުގައި އިސްލާމްދީނުގެ ރުކުންތަކަށް ފުރިހަމައަށް ބޯލަނބާ ކެޑޭޓެއް ކަމުގައި ދަރިވަރުން ހެދުމަށާއި، ޤައުމީ ރޫޙާއި ޤައުމީ ލޯބި އުފައްދައި، ގުޅިގެން މަސައްކަތްކުރުމުގެ ރޫޙް އުފައްދައި، އަދި ސިއްޙަތާއި ހަށިހެޔޮކަމަށް ސަމާލުކަންދީގެން ތަމްރީނުތައް ވަނީ ބައްޓަންކޮށްފައެވެ. މި ކެޑޭޓު ކޭމްޕުގައި މުދައްރިބުންގެ ގޮތުގައި މަސައްކަތްކުރާނީ އެމްއެންޑީއެފް ނޮދަން އޭރިއާގެ ސިފައިންނެވެ.

މިއަދު ބޭއްވި ކެޑޭޓު ކޭމްޕު ފެށުމުގެ ރަސްމިއްޔާތުގައި އެމްއެންޑީއެފް ނޮދަން އޭރިއާގެ އޮފިސަރުންނާއި އެކި ރޭންކުތަކުގެ ސިފައިންގެ އިތުރުން ބައެއް ސްކޫލުތަކުގެ އިސް ވެރިންނާއި މުދައްރިސުން ބައިވެރިވެލެއްވިއެވެ.