ދުނިޔޭގެ އެންމެ ނުފޫޒު ގަދަ މީހުންގެ ލިސްޓުގައި ޕްރިޔަންކާ ހިމެނިދާނެ

ޓައިމް މަޖައްލާ އިން އަހަރަކު އެއް ފަހަރު ހޮވާ ދުނިޔޭގެ އެންމެ ނުފޫޒުގަދަ 100 މީހުންގެ ލިސްޓުގައި ޕްރިޔަންކާ ޗޮޕްރާ ހިމެނޭނެ ކަމަށް ބެލެވިއްޖެއެވެ.

ބޭރުގެ ބައެއް މީޑިއާގެ ރިޕޯޓުތަކުން ބުނާ ގޮތުގައި މި ލިސްޓުގައި ޕްރިޔަންކާ ހިމެނިދާނެ ސަބަބަކަށް ވަނީ ބޮލީވުޑްގައި މިހާރު ހުރި އެންމެ އަގުބޮޑު އެކްޓަރަށް ވެފައި ޕްރިޔަންކާގެ ޑްރާމާ ސީރީޒް “ކުއަންޓިކޯ” އިން ހޮލީވުޑްގެ ސަމާލުކަން ހޯދާފައިވާތީ އެވެ. މީގެ އިތުރުން ޑުވޭން ޖޮންސަން އަދި ޒެކް އެފްރޮންއާއި އެކު “ބޭވޮޗް” ރީމޭކްއިން ހޯލީވުޑްގެ ފިލްމީ ދާއިރާއަށްވެސް ޕްރިޔަންކާ ޑެބިއުޓް ކުރާނެއެވެ.

ޕްރިޔަންކާގެ އިތުރުން މި ލިސްޓުގައި އިންޑިޔާ މީހުން ތަކުގެ ތެރޭގައި ޕްރައިމް މިނިސްޓަރ ނަރެންދުރަ މޯދީ ގޫގަލްގެ ސީއީއޯ ސުންޑަރު ޕިޗާއީއާއި މައިކްރޮސޮފްޓް ގެ ސީއީއޯ ސަތުޔާ ނަޑެލާ އަދި ސާނިޔާ މިރުޒާ ހިމެނޭނެ ކަމަށް ރިޕޯޓުތަކުން ބުނެއެވެ.

ކޮންމެ އަހަރަކުވެސް ނެރޭ މި ލިސްޓުގައި މުނިފޫހިފިލުވުމުގެ ދާއިރާގެ އިތުރުން ސިޔާސީ، ސައިންސާއި ޓެކްނޮލޮޖީ އަދި މި ނޫންވެސް އެކި ދާއިރާތަކުން މީހުން ހޮވިގެންދެއެވެ. އަދި އެ ލިސްޓުގައި ހިމެނޭނެ މީހުން ކަނޑައަޅަނީ އެ މަޖައްލާގެ އެޑިޓަރުންނެވެ.