ރެޑްބުލް ގަލަން ކޮށްޓާ މުބާރާތުގެ ރަނަރަޕަކަށް އިބްރާހިމް އަބްދުލް ސައްތާރު ހޮވިއްޖެ

ރެޑްބުލް ގަލަން ކޮށްޓާ މުބާރާތުގެ ރަނަރަޕްކަން ވިލާ އިންޓަނޭޝަނަލް ހައި ސުކޫލްގައި ތައުލީމް ހާސިލްކުރަމުންދާ ކުޅުދުއްފުށީގެ ދަރިވަރެއް ކަމުގައިވާ އިބްރާހިމް އަބްދުލް ސައްތާރު ހޯދައިފި އެވެ.

ފެކަލްޓީ އޮފް ހެލްތު ސައިންސްގައި ތައުލީމް ހާސިލް ކުރަމުންދާ ދަރިވަރު ޝިހާމް އަމީން މި މުބާރާތުގެ ޗެމްޕިއަންކަން ހޯދީ ސައްތާރުއާ ވާދަކޮށް 5 ގޭމް 4 ގޭމް އިންނެވެ.

2014 ވަނަ އަހަރު ރާއްޖޭން ހުށަހެޅި ހިޔާލަކަށް ރެޑްބުލްއިން ޔުނިވާސިޓީ އަދި ކޮލެޖް ދަރިވަރުންނަށް އަމާޒުކޮށްގެން ބާއްވަމުން އަންނަ މި މުބާރާތުގެ ޗެމްޕިއަނަށް 20,000ރ ހުށަހެޅިފައިވެ އެވެ.

މި މުބާރާތުގައި މެޗުތައް ކުޅޭނީ މުބާރާތް ހާއްސަކޮށް ތައްޔާރުކޮށްފައިވާ ކަރުދާސް ޕިޗުތަކެއްގަ އެވެ. ޕިޗުގައި ފޯމޭޝަން އަތުރާނީ މެޗެއްގައި ވާދަކުރާ ކުޅުންތެރިން ބޭނުންވާ ގޮތަކަށެވެ. މެޗަކަށް ކަނޑައަޅާފައިވާ ގަޑި ހަމަވާއިރު ދެ ކުޅުންތެރިން އެއްވަރުވެއްޖެ ނަމަ، ނަތީޖާ ނެރޭނީ ޕެނަލްޓީންނެވެ.