ހިޔާލު ފާޅުކުރުމުގެ މިނިވަންކަމަށް ހުރަސް އެޅޭ ބައިތައް އުނިކުރަން ނޫސްވެރިން ގޮވާލައިފި

އަބުރު ރައްކާތެރިކޮށްދިނުމާއި ހިޔާލު ފާޅުކުރުމުގެ މިނިވަންކަމުގެ ބިލުގައި ނޫސްވެރިކަމުގެ މިނިވަންކަމާއި އާންމު ރައްޔިތުންނަށް ލިބިދޭ ހިޔާލު ފާޅުކުރުމުގެ މިނިވަންކަމުގެ ހައްގަށް ހުރަސް އެޅޭ ބައިތައް އުނިކުރަން ރާއްޖޭގެ ބައެއް ސީނިއަ ނޫސްވެރިން މިއަދު ގޮވާލައިފި އެވެ.

މި ނޫސްބަޔާނަކީ ރާއްޖޭގެ އިސް ދިހަ ނޫސްވެރިޔަކު ސޮއިކޮށް ނެރުނު ބަޔާނެ ކެވެ.

އެގޮތުން ބަޔާނުގައިވާ އެދިފައި ވަނީ ނޫސްވެރިކަމުގެ ދާއިރާ އިން ކުރިމަތިވާ އަބުރާ ބެހުމުގެ މައްސަލަތައް، ކަމާ ގުޅޭ މިނިވަން މުއައްސަސާތައް މެދުވެރިކޮށް ހައްލުކުރެވޭނެ އިންތިޒާމުތަކާ މެދު ރައްޔިތުންގެ މަޖިލީހުގެ މެމްބަރުންނާއި ދައުލަތުގެ ކަމާ ގުޅޭ މުއައްސަސާތަކުން ވިސްނުމަށެވެ.

ިލް ފާސްކުރި ނަމަވެސް އޭގެ މަގުސަދު، ޓެކްނޮލޮޖީގެ ވަސީލަތްތަކުން ހަބަރާއި މައުލޫމާތު ފަތުރާ ޒަމާނަކަށް ވުމުން، ހާސިލްވުމަކީ މުސްތަހީލު ކަމެއް ކަމަށާއި މިހާރު ބިލް އޮތް ގޮތުން ހުރަސްއެޅޭނީ ހަމައެކަނި މިނިވަން ނޫސްވެރިކަމަށް އެކަންޏެއް ނޫން ކަމަށެވެ.

އޭގެ އިތުރުން އާންމު ރައްޔިތުންނަށް ލިބިފައި އޮތް ހިޔާލުފާޅުކުރުމުގެ މިނިވަންކަމަށް ވެސް ވަރަށް ބޮޑަށް ހުރަސް އެޅޭނެ ކަމަށް ބަޔާނުގައި ބުނެފައި ވެއެވެ. އަދި އޭގެ ބަދަލުގައި ދެން އުފެދޭނީ ކޮން ބައެއްކަން ނޭނގޭ ގޮތަށް ހިންގާ އަންޑަގްރައުންޑް މީޑިއާތައް ކަމަށާއި އޭގެ އުނދަގޫ އެންމެންނަށް ވެސް ކުރިމަތިވާނެ ކަމަށްވެސް މިބަޔާނުގައިވެ އެވެ.

ބަޔާނުގައި ބުނެފައިވާ ގޮތުގައި ރައްޔިތުންގެ މަޖިލީހުން އެއްވެސް ހައްގެއް ނުވަތަ މިނިވަންކަމެއް ހިފެހެއްޓޭނީ ތަހުޒީބީ މުޖުތަމައުތަކުގައި ހަނިކުރެވޭނެ މިންވަރަށް ކަން ގާނޫނު އަސާސީގައި ބަޔާންކޮށްފައިވެ އެވެ. ނަމަވެސް މިހާރު ފަރުމާކޮށްފައި އޮތް ބިލުން ހިޔާލު ފާޅުކުރުމާއި ނޫސްވެރިކަމުގެ މިނިވަންކަމަށް ހުރަސް އެޅި އަސާސީ ހައްގުތަކުން ރައްޔިތުން މަހްރޫމްވުމުގެ ބިރު އެބަ އޮތް ކަމަށް ބަޔާނުގައިވެ އެވެ.

އޭގެ އިތުރުން މިހާރު ބިލު އޮތް ގޮތުން ދައުލަތުގެ އެކި މަގާމުތަކުގައި ތިއްބަވާ ބޭފުޅުންގެ އިންޓަގްރިޓީ އާއި އެބޭފުޅުންނާ މެދު ކުރެވޭ ސީރިއަސް ތުހުމަތުތަކާ ބެހޭ ގޮތުން ނޫސްވެރިންގެ އިތުރުން އާންމު ފަރުދަކަށް ވެސް ވާހަކަ ދެއްކުމުގެ މިނިވަންކަން ގެއްލުން އެއީ ނޫސްވެރިން އެންމެ ބޮޑު އެއް ކަންބޮޑުވުން ކަމަށް ބަޔާނުގައި ވެއެވެ.

އެ ބިލު ގާނޫނަކަށް ވެއްޖެ ނަމަ ހިތްހަމަނުޖެހޭ ކިތަންމެ ކުޑަ ވާހަކައެއް މީޑިއާގައި ދެއްކި ނަމަވެސް އަބުރާ ބެހުމުގެ ހުއްޖަތް ދައްކައި ފުލުހުން މެދުވެރިކޮށް ޖިނާއީ ތަހުގީގުކޮށް ދައުވާ ކުރުމުގެ ފުރުސަތު ލިބޭނެ ކަމަށް ވެސް ބަޔާނުގައި ފާހަގަކުރި އެވެ. އެހެންކަމުން އެއީ ގާނޫނު އަސާސީގައި ކަށަވަރުކޮށް ދީފައިވާ ހަމަތަކާ މުޅިން ހިލާފު ބިލެއް ކަމަށް ވެސް ސީނިއަ ނޫސްވެރިން ގަބޫލުކުރެ އެވެ.

ނަމަވެސް އެފަދަ ބަދަލުތަކެއް ގެނައުމުގެ ބަދަލުގައި ހިޔާލު ފާޅުކުރުމާއި ނޫސްވެރިކަމުގެ މިނިވަންކަން މުޅިން ގެއްލޭ ގޮތަށް ބިލެއް ހުށަހެޅުމުން ވަރަށް ބޮޑެތި ސުވާލުތަކެއް އުފެދޭ ކަމަށާއި ބިލު މިހާރު އޮތް ގޮތުން ކަންބޮޑުވާ ކަމަށް ވެސް މި ބަޔާނުގައިވެ އެވެ.

ބަޔާނުގައި ސޮއިކޮށްފައިވާ ސީނިއާ ބައެއް ނޫސްވެރިންނަކީ، ހަވީރުގެ މޫސާ ލަތީފާއި ސަން އޮންލައިންގެ އަހުމަދު ޒާހިރު (ހިރިގާ) އާއި ހަވީރުގެ އަހުމަދު އަބްދުﷲ ސައީދާއި ދިޓީވީގެ މިދުހަތު އާދަމާއި އަވަސް އޮންލައިންގެ އާދަމް ހަލީމާއި ހަވީރުގެ އަހުމަދު ހަމްދޫނާއި ރާއްޖެ ޓީވީގެ ހުސެއިން ފިޔާޒް މޫސާ އާއި ސީއެންއެމްގެ އިސްމާއިލް ރަޝީދު އަދި މިނިވަން ނިއުސްގެ ޒަހީނާ ރަޝީދެވެ.

މަސްދަރު: ހަވީރު ނިއުސް