ކުޅުދުއްފުށީގައި ގާއިމްކުރާ ގުރުއާނާ ބެހޭ މަރުކަޒުގެ އިމާރާތުގެ މަސައްކަތް ނިންމާލައިފި

ކުޅުދުއްފުށީގައި ގާއިމްކުރާ ކީރިތި ގުރުއާނާ ބެހޭ މަރުކަޒުގެ އިމާރާތުގެ މަސައްކަތް ނިންމާލައިފި އެވެ.

ގުރުއާނާ ބެހޭ މަރުކަޒުގެ ސެންޓަރެއް ކުޅުދުއްފުށީގައި ގާއިމްކުރަން ހަމަޖައްސާފައިވަނީ ކައުންސިލްގެ އިދާރާގެ އިމާރާތެއް ކަމަށްވާ “ހިދުމަތް” ގަ އެވެ. އެކަމަށްޓަކައި އެތަން ވަނީ ވަރަށް ބޮޑަށް މަރާމާތުކޮށް، އާބާތުރަ ފިލުވާފަ އެވެ.

ކައުންސިލުގެ ނައިބް ރައީސް އައިމަން ވިދާޅުވީ ގުރުއާނާ ބެހޭ ގޮފި ގާއިމްކުރުމަށް ހަމަޖެހިފައިވާ އިމާރާތުގެ މަސައްކަތް މިހާރު ނިމިފައިވާ ކަމަށެވެ. އެހެންނަމަވެސް ސެންޓަރުގައި ކިޔަވައިދޭން ފެށޭނެ ތާރީހެއް އަދި ނޭނގޭ ކަމަށް އޭނާ ވިދާޅުވި އެވެ.

އައިމަނު ވިދާޅުވީ ސެންޓަރަށް ޓީޗަރެއް ހޯދުމުގެ މަސައްކަތް ކުރިއަށްދާ ކަމަށެވެ.

މި ނޫހަށް މައުލޫމާތު ދެއްވަމުން ކައުންސިލްގެ ރައީސް އަލީ މުހައްމަދު މިދިޔަ އަހަރު ވިދާޅުވެފައިވަނީ ރަށުގައި ގާއިމުކުރެވޭ ޤުރުއާނާ ބެހޭ މަރުކަޒުން މާލޭގެ ޤުރުއާނާ ބޭހޭ މަރުކަޒުން ދޭ ހުރިހާ ހިދުމަތެއްހެން ދޭނެ ކަމަށެވެ. އެގޮތުން އިމާމުންނާއި މުދިމުން ތަމްރީނު ކުރާ ކޯސްތަކާއި ޤުރުއާން ކިޔަވަން ދަސްކޮށްދޭ ކޯސްތައް ހިންގާނެ ކަމަށް އޭނާ ވިދާޅުވެފައި ވެއެވެ.

ކުޅުދުއްފުށީގައި ކީރިތި ގުރުއާނާ ބެހޭ މަރުކަޒުގެ ސެންޓަރެއް ގާއިމްކުރުމުގެ މަސައްކަތް ކައުންސިލުން ކުރަމުން އަންނަތާ މިހާރު އަހަރަކަށް ވުރެ ގިނަ ދުވަސް ވަނީ ވެފަ އެވެ.