ބަދުއަހުލާޤީ އަމަލު ހިންގުމަށް ދައުވަތު ދިނުމަށް ފަހު، ބިރު ދައްކައިގެން ފައިސާ އަތުލި މައްސަލައެއް ބަލަނީ

ބަދުއަހުލާޤީ އަމަލު ހިންގުމަށް ދައުވަތު ދީގެން، ފިރިހެނަކު ކުޅުދުއްފުށި ގެއަކަށް ގެނެސް ބިރުދައްކައިގެން ފައިސާ ތަކެއް ފޭރުނު މައްސަލައެއް ފުލުހުން ބަލަން ފަށައިފި އެވެ.

“ކުޅުދުއްފުށި އޮންލައިނަށް” އެނގިފައިވާ ގޮތުގައި މިމައްސަލައެއް ދިމާވީ އަންހެނަކު “ޖިންސީ ގުޅުން” ހިންގުމަށްކަމަށް ބުނެ ދަންވަރު ފިރިހެނަކު ގެއަކަށް ވައްދައި އެމީހާ ބަރަހަނާކުރުމަށް ފަހު އެވެ.

“ފައިސާއަށް “އެކަން” ކޮށްދޭނެ ކަމަށް ބުނެ ދަންވަރު އެމީހާ ގެނައީ. ދެން ބަރަހަނާވުމުން އަންހެން މީހާ ރައްޓެހި އިތުރު ފިރިހެނަކު ކޮޓަރިއަށް ވައްދައި، ބިރުދައްކައި ބުލެކްމެއިލްކޮށްގެން ފައިސާ އަތުލީ.” އެކަން ރަނގަޅު އެނގިހުރެ ވާހަކަދެއްކި މީހަކު މިނޫހަށް ކިޔައިދިނެވެ.

މައުލޫމާތު ލިބިފައިވާ ގޮތުގައި އެމީހާގެ އަންނައުނު ހިފަހައްޓައި ފައިސާ ދިނުމަށް ޑިމާންޑް ކުރުމުން، ކޮޓަރިންވެސް ނިކުމެވުނީ ފައިސާ ދިނުމަށް ފަހުކަމަށް ވެއެވެ. ކުޅުދުއްފުށީ ކައިރި އެހެން ރަށަކަށް ނިސްބަތްވާ މި ފިރިހެން މީހާގެ އުމުރަކީ ގާތްގަނޑަކަށް 40 ހަކަށް އަހަރެވެ.

މިނޫހަށް މައުލޫމާތު ދެއްވަމުން ފުލުހުންގެ މީޑިއާ އޮފިޝަލު ވިދާޅުވީ ގެއަކަށް ފިރިހެނަކު ގެންދިއުމަށް ފަހު އެމީހާގެ އަތުން ފައިސާތަކެއް ފޭރުނު މައްސަލައެއް މިދިޔަ ފެބުރުއަރީމަހު ހުށަހެޅި ބަލަމުން އަންނަކަމަށެވެ.

މިމައްސަލައިގެ ތުހުމަތުގައި އަންހެނަކާއި ފިރިހެނެއް ފުލުހުންގެ ބެލުމުގެ ދަށުގައިވާ ކަމަށް ފުލުހުން ބުނެ އެވެ. އޭގެ ތެރެއިން އަންހެން މީހާ ހުރީ ގޭ ބަންދުގައި ކަމަށްވެސް ފުލުހުން މައުލޫމާތު ދެއެވެ.

މިނޫހަށް އެނގިފައިވާ ގޮތުގައި ބިރުދައްކައިގެން ފޭރުނު މިމައްސަލައިގެ ތުހުމަތުގައި ހައްޔަރުކޮށްފައިވަނީ ކުޅުދުއްފުށީ، ޒުރިޔާނުމާގެ އައިމިނަތު މުހައްމަދާއި ކުޅުދުއްފުށީ، ގުމުރީގެ ސޮލާހް މުހައްމަދެވެ. މިދެމީހުންނަކީ ވެސް 26 އަހަރުގެ ދެމީހުންނެވެ.

މި ދެ މީހުންގެ ތެރެއިން އަންހެން މީހާގެ ބަންދުގެ މުއދަތު 15 ދުވަސް ޖަހާފައިވާއިރު ފިރިހެން މީހާގެ ބަންދަށް ޖަހާފައިވަނީ 10 ދުވަހެވެ. .