ސްކޫލް ސްޓާފުންގެ މެދުގައި ކުޅެވޭ ފުޓްސަލް މުބާރާތް ފަށައިފި

ކުޅުދުއްފުށީ ސްކޫލްތަކުގެ ސްޓާފުންގެ މެދުގައި ކުޅެވޭ ފުޓްސަލް މުބާރާތް ފަށައިފި އެވެ.

މި މުބާރާތް ހުޅުވުމުގެ ގޮތުން ރޭ ކުޅެވުނު ފުރަތަމަ މެޗުގައި ޓީމް ފޭސްބުކް އަދި ޓީމް ޓްވިޓާ ކުޅުނު މެޗު 7-4 އިން ކާމިޔާބުކުރީ ޓީމް ފޭސްބުކް އިންނެވެ.

ރޭގެ ދެވަނަ މެޗުގައި ބައްދަލު ކުރީ ޓީމް ވައިބާ އަދި ޓީމް އިންސްޓަގްރާމް އެވެ. މި މެޗު 19-7 ގެ ތަފާތު ބޮޑު ނަތީޖާއަކުން ކާމިޔާބުކުރީ ޓީމް ވައިބާއިންނެވެ.

މިރޭވެސް މި މުބާރާތުގައި ދެ މެޗު ކުޅުމަށް ހަމަޖެހިފައިވާއިރު ފުރަތަމަ މެޗުގައި ބައްދަލުކުރާނީ ޓްވިޓާ އަދި ވައިބާ އެވެ. ދެވަނަ މެޗުގައި ބައްދަލުކުރާނީ ފޭސްބުކް އަދި އިންސްޓަގުރާމް އެވެ. މެޗުތައް ފެށޭނީ 20:30 ގަ އެވެ.

މި މުބާރާތް 1 އޭޕްރިލް އިން 10 އޭޕްރިލް އަށް ކުރިއަށްދާއިރު، މި އަހަރުގެ މުބާރާތުގެ މެޗުތައް ކުޅެނީ ކުޅުދުއްފުށީ ފުޓްސަލް އެރީނާގަ އެވެ.

ކުޅުދުއްފުށީގެ ހަތަރު ސްކޫލް ކަމުގައިވާ ޖަލާލުއްދީން ސްކޫލް، ހދ އޭއީސީ، އަފީފުއްދީން ސްކޫލް އަދި އަމީރު އަމީން ސްކޫލްގެ މުވައްޒަފުންގެ މެދުގައި ބާއްވަމުން އަންނަ މި މުބާރާތުގައި މި އަހަރު ޖުމްލަ ހަތަރު ޓީމް ވާދަކުރެ އެވެ. ޓީމުތައް ބަހަނީ ހުރިހާ ކުޅުންތެރިން ކެޓަގަރައިޒްކޮށް ގުރުއަތުންނެވެ.

މި މުބާރާތް މި އަހަރު މި ބޭއްވެނީ އެއް އަހަރުގެ މެދުކެނޑުމަކަށްފަހު އެވެ.