ރަށޮވެށި އެމްވީގެ އެޑިޓަރާ ދެކޮޅަށް މީހަކު އަބުރުގެ ދައުވާ ކޮށްފި

Apr 6, 2016

ފުވައްމުލަކު ވެބްސައިޓެއް ކަމަށްވާ “ރަށުވެށި އެމްވީގެ” އެޑިޓަރު އަހުމަދު މައުރޫފްގެ މައްޗަށް އެ ރަށުގެ މީހަކު އަބުރުގެ ދައުވާއެއް ކޮށްފިއެވެ.

މި ދައުވާކޮށްފައިވަނީ އެ ރަށުގައި ކުރިން ކައުންސިލަރެއްގެ ގޮތުގައިއުޅުއްވި އިބްރާހިމް ޖުނައިދު ކަމަށާއި އަބުރުގެ މައްސަލަ ހުށައަޅާފައިވަނީ އެ ވެބްސައިޓުގައި ޝާއިއު ކޮށްފައިވާ ހަބަރެއްގައި ޖުނައިދުގެ ނަން ނުހަމަގޮތުގައި ބޭނުންކޮށްފައި ވާތީ ކަމަށް ކުޅުދުއްފުށި އޮންލައިނަށް އަހުމަދު މައުރޫފު މައުލޫމާތު ދިނެވެ.

މީގެ ކުރިން ޓީވީއެމްގައި ވެސް މަސައްކަތް ކުރެއްވި މައުރޫފް ވިދާޅުވީ ޖުނައިދު އޭނާގެ މައްޗަށް އަބުރުގެ ދައުވާ ކޮށްފައި ވަނީ، ފުނާޑު އަންހެން ފުޓްސަލް ޓީމުގެ އޮފިޝަލަކާ ހަވާލާދީ ލިޔުނު ހަބަރެއްގައި ޖުނައިދުގެ ނަން ބޭނުންކޮށްފައި ވާތީ އޭނާގެ އަބުރަށް ހުތުރުވާ ކަމަށް ބުނެ ބަދަލު ނަގައިދިނުމަށެވެ.

މައްސަލައިގެ އިބްތިދާއީ އަޑުއެހުމެއް މިއަދު ހެނދުނު 10:30 ގައި ފުވައްމުލަކު ކޯޓުގައި ބާއްވައިފަވާއިރު ޖުނައިދުގެ އަބުރަށް ހުތުރުވާ ފަދަ އެއްވެސް ވާހަކައެއް އެ ނޫހުން ޝާއިއު ނުކުރާ ކަމަަށް މައުރޫފު ވިދާޅުވެއެވެ. އަދި އެހަބަރުގައި ޖުނައިދު އަށް ރައްދުވާ ވާހަކަތައް ލިޔެފައި ވަނީ ނޫހަށް މައުލޫމާތު ދިން އޮފިޝަލަކާ ހަވާލާދީ ކަމަށް ވެސް މައުރޫފް ވިދާޅުވި އެވެ.

މީގެ އިތުރުން ޒިންމާދާރު މަގާމުގައި ތިއްބެވި ބޭފުޅުން ޒިންމާދާރު ކުުރުމަށް ގާނޫނީ އިމުގެ ތެރެއިން ކުރާ މިފަދަ ކަންތައްތަކަށް ރަށުވެށިން މަރުހަބާ ކިޔާ ކަމަށް މައުރޫފު ވިދާޅުވިއެވެ.

“ސަރުކާރުގެ އިސް މަގާމެއްގައި ނުވަތަ އެނޫންވެސް ޒިންމާދާރު މަގާމުގައި ތިއްބެވި ބޭފުޅުން ޒިންމާދާރު ކުރުމަށް ގާނޫނީ އިމުގެ ތެރެއިން އެ މީހުން ކުރާ ކަންތައްތަކަށް ރަށުވެށިން މަރުހަބާ ކިޔަން” މައުރޫފު ވިދާޅުވިއެވެ.

މައުރޫފުގެ މައްޗަށް އަބުރުގެ ދައުވާކޮށްފައި ވަނީ އަބުރު ރައްކާތެރިކުރުމަށް ސަރުކާރުން މަޖިލީހަށް ހުށައެޅި ބިލުގައި ހިޔާލު ފާޅުކުރުމުގެ މިނިވަންކަމަށާއި ނޫސްވެރިކަމުގެ މިނިވަންކަމަށް ހުރަސްއެޅޭ ކަންކަން ހުރި ކަން ފާހަގަކޮށް ބިލާމެދު ނޫސްވެރިން ކަންބޮޑުވުން ފާޅުކުރަމުންދާ ދަނޑިވަޅެއްގައި އެވެ.

މިލިޔުމާއި ގުޅޭ