ދުނިޔޭގެ އެންމެ ތުނި ލެޕްޓޮޕް “އެޗްޕީ ސްޕެކްޓަރ”

ދުނިޔޭގައި މިހާތަނަށް އުފެއްދުނު އެންމެ ތުނި ލެޕްޓޮޕް އެޗްޕީ ކުންފުނިން ދައްކާލައިފިއެވެ.

“އެޗްޕީ ސްޕެކްޓަރ” އަކީ ތުނި މިނުގައި 10.4 މިލިމީޓަރު ހުންނަ އަދި ފުޅާމިނުގައި 13.3 އިންޗީގެ ނޯޓްބުކްއެކެވެ. އިންޓެލް ކޯ އައި5 ގެ މައިކްރޯ ޕްރޮސެސަރއެއް އެކުލަވާލެވިފައިވާ މި ނޯޓްބުކްގެ ޑިސްޕްލޭގައި ބޭނުން ކުރެވިފައި ވަނީ ގޮރިއްލާ ގްލާސް 4 އެކެވެ.

ވިންޑޮވްސް 10 އޮޕަރޭޓަށް ހާއްސަކޮށްފައިވާ މި ލެޕްޓޮޕަކީ ގިނަ ވަގުތު ޗާރޖް ހިފަހައްޓާނެހެން އުފައްދާފައިވާ ލެޕްޓޮޕެއް ކަމަށް އެކުންފުނިން ބުނެއެވެ. އެގޮތުން މެކްސިމަމް ބެޓެރީ ލައިފް 9 ގަޑިއިރާއި 30 މިނެޓް ހިފަހައްޓާނެ ކަމަށް އެޗްޕީ އިން ބުނެއެވެ.

މި ލެޕްޓޮޕްގެ ބަރުމިނުގައި 1.10 ކިލޯ ހުންނައިރު ޔޫއެސްބީގެ ބަދަލުގައި އެޗްޕީގެ “ސްޕެކްޓާ” ސީރީޒްގެ މި އާ ލެޕްޓޮޕްގައި ހިމަނާފައިވަނީ ޓައިޕް ސީ ޕޯޓްތަކެކެވެ.

ލެޕްޓޮޕްގެ ބޭރުގެ ބޮޑެތި ތޮށިގަނޑު މުޅިންހެން އެލުމިނިއަމް އިން ތައްޔާރުކޮށް ސީލް ކުރެވިފައި ވާއިރު ސްޓޯރޭޖް ގޭގައި ބަދަލު ނުކެރެވޭނެ ކަމަށް އެކުންފުނިން ބުނެއެވެ. އަދި އެގޮތަށް ލެޕް ފަރުމާކުރުމުގެ މަގުސަދަކީ ވީހާވެސް ތުނި އަދި “މޮޑާރން” ޑިޒައިނެއް އުފެއްދުން ކަމަށްވެސް އެކުންފުނިން ބުނެއެވެ.

މި ލެޕްޓޮޕް ބާޒާރަށް މި މަހުގެ 25 ވަނަ ދުވަހު ނެރެން ހަމަޖެހިފައިވާއިރު ލެޕްޓޮޕް ލިބެން ހުންނާނީ 1249 އެމެރިކާ ޑޮލަރުން ފެށިގެންށެވެ. އަދި ތަފާތު ކުލަތަކާއި ޑިޒައިންތައްވެސް ނެރެން ހަމަޖެހިފައިވާ ކަމަށްވެސް އެ ކުންފުނިން ބުނެއެވެ.