ސިއްހަތު ދުވަހާ ގުޅުވައިގެން ޕަބުލިކް ހެލްތުން ބަލި މީހުންނަށް ގިފްޓް ޕެކް ހަދިޔާކޮށްފި

Apr 7, 2016

ދުނިޔޭގެ ސިއްހަތު ދުވަހާ ގުޅުވައިގެން ކުޅުދުއްފުށީ ޕަބުލިކް ހެލްތު ޑިޕާޓްމެންޓުން ކުޅުދުއްފުށީ ހޮސްޕިޓަލުގައި އެޑްމިޓްކޮށްފައި ތިބި ބަލި މީހުންނަށް ގިފްޓް ޕެކެއް ހަދިޔާކޮށްފި އެވެ.

މިއަދު ހެނދުނު ކުރިއަށްދިޔަ މި ހަރަކާތުގައި ހޮސްޕިޓަލުގައި އެޑްމިޓްކޮށްފައިވާ 28 ބަލި މީހަކަށް ވަނީ ހަދިޔާ ދީފަ އެވެ.

މިކަމުގެ އިތުރުން ސިއްހަތު ދުވަހާ ގުޅުވައިގެން ކުޅުދުއްފުށީގައި ހުންނަ ސަރުކާރު މުވައްސަސާތަކުގެ މުވައްޒަފުން ހަކުރު ބައްޔަށް ސްކްރީން ކުރުމުގެ ޕްރޮގުރާމެއް އަންނަ އާދިއްތަ ދުވަހު ފަށާނެ ކަމަށް ޕަބުލިކް ހެލްތުން މައުލޫމާތު ދެ އެވެ.

ކޮމިއުނިޓީ ޕަބުލިކް ހެލްތު އޮފިޝަލް ފާތުމަތު ހަސަން ވިދާޅުވީ މި ސްކްރީނިންގ ފެށުމަށް ހަމަޖެހިފައިވަނީ އަންނަ އާދީއްތަ ދުވަހު ކަމަށާއި ސްކްރީނިންގ ގެތެރެއިން ހަކަރު ބައްޔަށް ހޭލުންތެރިކުރުން ވެސް ކުރިއަށްދާނެ ކަމަށް އޭނާ ވިދާޅުވި އެވެ. އަދި އެޕްރޮގުރާމްގެ ތެރެއިން 800 އަށްވުރެ ގިނަ މުވައްޒަފުން ސްކްރީން ކުރެވިގެންދާނެ ކަމަށް އޭނާ ލަފާކުރެއްވި އެވެ.

ވޯލްޑް ހެލްތު އޯގަނައިޒޭޝަން އިން ކޮންމެ އަހަރެއްގެ އޭޕްރިލް މަހުގެ ހަތް ވަނަ ދުވަހު ފާހަގަ ކުރަނީ ދުނިޔޭގެ ސިއްހަތު ދުވަހުގެ ގޮތުގައި އެވެ. މިއަހަރު ހާއްސަކޮށްފައި ވަނީ ހަކުރު ބައްޔާ ބެހޭ ގޮތުން އާއްމުން ހޭލުންތެރި ކުރުވުމަށެވެ.

މިއަދު ފާހަގަކުރަމުންދާ ދުނިޔޭގެ ސިއްހަތު ދުވަހުގެ ޝިއާރަކީ “ރައްކާތެރިވަމާ، ފަރުވާކުރަމާ، ހަކުރުބަލީގެ މައްޗަށް ކުރިހޯދަމާ” އެވެ.

މިލިޔުމާއި ގުޅޭ