ނޫސްވެރިންނަށް ދިމާވެފައިވާ ހުރަސްތަކާ ބިރުދެއްކުމުގެ އަމަލުތައް ހުއްޓާލުމަށް ގޮވާލައި ޕެޓިޝަނެއްގައި ސޮއި ކުރަނީ

ރާއްޖޭގެ ނޫސްވެރިންނަށް ދިމާވެފައިވާ ހުރަސްތަކާއި ބިރުދެއްކުމުގެ އަމަލުތަކުގެ ސަބަބުން ނޫސްވެރިންނަށް ކުރިމަތިވެފައިވާ ބިރުވެރި މާހައުލުން ނޫސްވެރިން ސަލާމަތް ކުރުމަށް ދައުލަތުގެ އިދާރާތަކުން އެކަށީގެންވާ ފިޔަވަޅުތައް އެޅުމަށް ގޮވާލައި ދިވެހި ނޫސްވެރިން ޕެޓިޝަނެއް ތައްޔާރުކޮށް ސޮއިކުރަން ފަށައިފި އެވެ.

ޕެޓިޝަނުގައި ނޫސްވެރިން ގޮވާލަފައި ވަނީ ނޫސްވެރިންގެ މަސައްކަތްތަކަށް ކުރިމަތިވެފައިވާ ހުރަސްތައް ނައްތާލައި ނޫސްވެރިން ކުރަމުން އަންނަ މުހިއްމު މަސައްކަތް ކުރާނެ އަމާން މާހައުލެއް ގާއިމްކުރުމަށްޓަކައި، މިހާރުން މިހާރަށް އަޅަން ޖެހިފައިވާ ފިޔަވަޅުތައް އެޅުމަށެވެ. މި ޕެޓިޝަނުގައި މިހާތަނަށް ގިނަ މީޑިއާތަކެއް ނުސްވެރިން ވަނީ ސޮއިކޮށްފަ އެވެ. އަދި ރާއްޖޭގެ ހުރިހާ މީޑިއާއެއްގެ ނޫސްވެރިން ދަނީ ސޮއިކުރަމުންނެވެ.

އޭގެ އިތުރުން ޕެޓިޝަނުގައި ބުނެފައިވަނީ، ދައުލަތުގެ މުއައްސަސާތަކުން އަޅަން ޖެހޭ ފިޔަވަޅުތައް އެޅުމުގެ ބަދަލުގައި ފެނިގެންދަނީ ކޯޓުތަކާއި ގާނޫނު ހަދާ މަޖިލީސް ފަދަ ދައުލަތުގެ މުއައްސަސާތަކުން ވެސް ނޫސްވެރިންގެ މަސައްކަތަށް އިތުރު ހުރަސްތަކެއް ކުރިމަތިކުރުވަން މަސައްކަތްކުރަމުންދާ މަންޒަރު ކަމަށާއި އަދި އެކަން އެގޮތަށް ނުކޮށް ނޫސްވެރިންނަށް ފަސޭހަ .ވެއްޓެއް ގާއިމް ކުރުމަށް އެ ޕެޓިޝަންގައި ނޫސްވެރިން ވަނީ ދައުލަތުގެ އެންމެހާ އިދާރާތަކަށް ގޮވާލައިފަ އެވެ

މި ޕެޓިޝަންގައި ގާތްގަނޑަކަށް ރާއްޖޭގެ ހުރިހާ މީޑިއާތަކުގެ ޗީފް އެޑިޓަރުން ސޮއިކޮށްފައި ވާއިރު މި ޕެޓިޝަންގައި ނޫސްވެރިން ވަނީ 9 ކަމަށް ގޮވާލާފަ އެވެ.

މި ޕެޓިޝަންގައި ނޫސްވެރިން ގޮވާލާފައިވާ ނުވަ ކަންތައް

• ވަގަށް ނަގާފައިވާ ނޫސްވެރިޔާ އަހުމަދު ރިލްވާންގެ ތަހުގީގު އަވަސްކޮށް، ކުށްވެރިވާ ފަރާތްތަކަށް އަދަބުދިނުން

• ވަކިވަކި ނޫސްވެރިންނަށާއި މީޑިއާ އައުޓްލެޓްތަކަށް ދީފައިވާ ހަމަލާތައް އަވަހަށް ތަހުގީގުކޮށް އެކަން ކުރި މީހުންނަށް އަދަބުދިނުން

• ބްރޯޑްކޮމްއަށް ފަދަ މީޑިއާ ރެގިއުލޭޓް ކުރާ ބޮޑީތައް ސިޔާސީ ނުކޮށް، މިނިވަން މުސްތަގިއްލު ތައުލީމީ އަދި ގާބިލް ބޭފުޅުން އައްޔަންކުރުން

• ސަންގް ޓީވީ، ރާއްޖެ ޓީވީގެ މައްސަލަތައް މިނިވަންކަމާއެކު ބަލައި އިންސާފުވެރިކޮށް އަމަލު ކުރުމަށް

• ގޭންގްތަކާއި ދީނީ އަދި ސިޔާސީ ގޮތުން ހައްދުފަހަނައަޅާފައިވާ ފަރާތްތަކުން ނޫސްވެރިންނަށް ހަމަލާދިނުން ހުއްޓުވަން އެކަށީގެންވާ ފިޔަވަޅު އެޅުން

• މިހާރު ހުށަހެޅިފައި އޮތް އަބުރާ ބެހުން މަނާ ކުރާ ބިލް މަޖިލީހުގެ ތަޅުމުން ބޭރުކޮށް، އިސްލާހުކުރުން

• މިލްކިއްޔާތާ މެދު އުފެދުނު މައްސަލައެއްގައި ހަވީރު ނޫސް ހުއްޓިފައި އޮތްއޮތުން ނިމުމަކަށް ގެނައުމަށް ދައުލަތުން މެދުވެރިއެއްގެ ދައުރު އަދާކުރުމަށް

• ނޫސްވެރިކަމުގެ ވާޖިބު އަދާކުރުމުގެ ތެރޭ ހައްޔަރުކުރި ނޫސްވެރިންނާ ދެކޮޅަށް ބަލަމުންދާ މައްސަލަތައް ހުއްޓާލައި ދައުވާނުކުރުމަށް

• ކޯޓުތަކަށް މީޑިއާތައް ނުވެއްދުމާއި ބައެއް މީޑިއާތައް އެކަހެރި ކުރަން އެންމެހާ މުއައްސަސާތަކުން ކުރަމުންދާ ކަންކަން ހުއްޓާލުމަށް

ޕެޓިޝަން ހުށަހަޅަން ހަމަޖެހިފައިވަނީ ރައްޔިތުންގެ މަޖިލީހަށާއި ރައިސުލްޖުމްހޫރިއްޔާ އަށާއި އުއްތަމަ ފަނޑިޔާރު އަދި މަޖިލީހުގެ މެޖޯރިޓީ ލީޑަރަށެވެ.

އޭގެ އިތުރުން ހުރިހާ މީޑިއާތަކެއްގެ އިސްވެރިން ހިމެނޭ ޓީމެއް، ކޮލަންބޯއަށް ޒިޔާރަތްކޮށް ބޭރުގެ މިޝަންތަކާ ވެސް މި ޕެޓިޝަން ހިއްސާކުރުމަށް ވަނީ ހަމަޖެހިފައިވާއިރު ޕެޓިޝަންްގައި ހުރި ކަންކަން ތަންފީޒު ކުރުމަށް ގުޅިފައިވާ ހަރަކާތްތަކެއް ހިންގުމަށް ވަނީ ރާވައިފަ އެވެ. އެގޮތުން އަބުރު ރައްކާތެރި ކުރުމުގެ ނަމުގައި ހުށަހަޅާފައިވާ ބިލާ ދެކޮޅު ހެދުމުގެ ގޮތުން މެދުކެނޑުމެއް ނެތި ތަފާތު ހަރަކާތްތައް ހިންގުމަށް ވަނީ ރާވައިފަ އެވެ.

މާލޭގައި ހަރަކާތްތެރިވާ މީޑިއާތަކުގެ އިތުރުން އަތޮޅުތަކުގެ ތެރޭގައި ހިންގާ މީޑިއާތަކުގެ ނޫސްވެރިން ވެސް ވަނީ މި ޕެޓިޝަންގައި ސޮއިކޮށްފައިވެ އެވެ. އެގޮތުން ކުޅުދުއްފުށީ އޮންލައިންވެސް ވަނީ މި ޕެޓިޝަންގައި ސޮއި ކޮށްފަ އެވެ.