ނޭޕާލްގައި ތިބި ދިވެހި ދަރިވަރުން ލޭ ހަދިޔާކުރުމުގެ ހަރަކާތެއް ހިންގައިފި

ނޭޕާލްގައި ތައުލީމް ހާސިލްކުރަމުން އަންނަ ދަރިވަރުންތަކެއް ލޭ ހަދިޔާ ކުރުމުގެ ހާއްސަ ހަރަކާތެއް ބާއްވައިފިއެވެ.

ވޯލްޑް ހެލްތު ޑޭ ފާހަގަކުރުމުގެ ގޮތުން ބޭއްވި މިހަރަކާތް ކުރިޔަށް ގެންގޮޮސްފައި ވަނީ ނޭޕާލްގެ މެޓާނިޓީ ހޮސްޕިޓަލެއް ކަމަށްވާ ޕްރަސޫތީ ގްރިހާ ހޮސްޕިޓަލުގައި އެވެ.

މި ހަރަކާތުގައި އިސްކޮށް އުޅުނު ކުޅުދުއްފުށި އިލާ މުހައްމަދު އަލީ ކުޅުދުއްފުށި އޮންލައިނަށް މައުލޫމާތު ދެމުން ބުނީ ނޭޕާލްގައި މިއަދު ކުރިޔަށް ދިޔަ މި ހަރަކާތުގައި ޖުމްލަ 47 ފަރާތަކުން ލޭ ހަދިޔާކޮށްފައިވާ ކަމަށާއި އޭގެ ތެރޭގައި 20 ދިވެހިން ހިމެނޭ ކަމަށެވެ.

މި ހަރަކާތް އިންތިޒާމު ކުރި މޯލްޑިވްސް ސްޓޫޑެންޓު އެސޯސިއޭޝަން އަކީ 150 ކުދިން ހިމެނޭ ނޭޕާލްގައި ގިނައިން މެޑިސިންގެ ދާއިރާއިން ތައުލީމް ހާސިލް ކުރަމުން އަންނަ ދަރިވަރުންތަކެކެވެ.

އެ އެސޯސިއޭޝަނުގެ ހަރަކާތްތައް 3 ވަރަކަށް އަހަރު ހުއްޓިފައި އޮތް ނަމަވެސް މި އަހަރުގެ މި ހަރަކާތާއެކު އާ ޖޯށެއްގައި އަލުން އެސޯސިއޭޝަނުގެ މަސައްކަތްތައް ކުރިޔަށް ގެންދިއުމުގެ އަޒުމުގައި ފަށާފައިވާ ކަމަށް މުހައްމަދު އަލީ ބުންޏެވެ.

ހެލްތު ޑޭ ފާހަގަ ކުރުމުގެ ގޮތުން ރާއްޖޭގައި އެކި ފަރާތްތަކުން ހަރަކާތްތައް ކުރިޔަށް ގެންގޮސްފައިވާއިރު މިއަދު ކުޅުދުއްފުށި ޕަބްލިކް ހެލްތުންވެސް ވަނީ ހޮސްޕިޓަލުގައި ތިބި ބަލި މީހުންނަށް ގިފްޓް ޕެކް ހަދިޔާކޮށްފައެެވެ.