ކުޅުދުއްފުއްޓަށް ހޭންޑްބޯލް ތައާރަފްކުރުމަށް ކުރިއަށްގެންދިޔަ ޕްރޮގުރާމް ނިންމާލައިފި

ކުޅުދުއްފުއްޓަށް ހޭންޑްބޯލް ތައާރަފްކުރުމުގެ ގޮތުން މަގުލަސް ކުލަބާއި ހޭންޑްބޯލް އެސޯސިއޭޝަން ގުޅިގެން ކުރިއަށްގެންދިޔަ ޕްރޮގުރާމް ނިންމާލައިފި އެވެ.

މިމަހު 4 ން 10 ކުރިއަށްގެންދިޔަ މި ޕްރޮގުރާމްގެ ތެރެއިން ކޯޗިން ކޭމްޕަކާއި ކުޑަކުދިންގެ ހޭންޑްބޯލް ފެސްޓިވަލެއް ވެސް ކުރިއަށްގެންދިޔަ އެވެ.

ކޯޗިން ކޭމްޕްގެ ބައިވެރިންނަށް ސެޓްފިކެޓް ދިނުމުގެ ހަފްލާ ތެރެއިން–ފޮޓޯ: ބަދީއު

ހޭންޑްބޯލް ތައާރަފްކުރުމަށް ފަހު މިދިޔަ ހުކުރުދުވަހު ޒޯން ސްޓޭޑިއަމްގައި ބޭއްވި ކުޑަކުދިންގެ ހޭންޑްބޯލް ފެސްޓިވަލުގައި ކުޅުދުއްފުށީ ސްކޫލުތަކުގެ ގުރޭޑް 1،2،3 ގެ 180 ކުދިން ބައިވެރިވި އެވެ.

އަދި ގުރޭޑް 4 ން 7 ދެތެރޭގެ ކުދިންނަށް ކޯޗިން ކުލާސްތަކެއް ވެސް ކުރިއަށްގެންގޮސްފައިވެ އެވެ. ބޮޑެތި މީހުންނަށް އަމާޒުކޮށްގެން ކުރިއަށްގެންދިޔަ ކޯޗިން ކޭމްޕުގައި 35 ފަރާތަކުން ބައިވެރިވެ 31 ފަރާތެއް ވަނީ ސެޓްފިކެޓް ހާސިލްކޮށްފަ އެވެ.

ކޯޗިން ކޭމްޕްގައި ބައިވެރިވެ ސެޓްފިކެޓް ހާސިލްކުރި ފަރާތްތަކަށް ސެޓްފިކެޓް ހަވާލުކޮށްދެއްވީ ގައުމީ ހޭންޑްބޯލް ޓީމްގެ ކޯޗު އަމްޒަދު ހުސެއިންނެވެ.