ސިއްހީ ދާއިރާއަށް ދިގު މުއްދަތަކަށް ހިދުމަތް ކުރެއްވި ސެންޓަރު ހަސަންބެގެ އަގުވަޒަން ކޮށްފި

ޞިއްޙީ ދާއިރާއަށް ދިގުމުއްދަތަކަށް ޚިދުމަތް ކުރެއްވައިފައިވާ ކުޅުދުއްފުށީ އަންބަރީގޭ ހަސަން އަހުމަދު (ސެންޓަރު ހަސަންބެ)އަށް އަގުވަޒަން ކުރުމުގެ ގޮތުން ހަނދާނީ ފިލައެއް ހަދިޔާ ކޮށްފި އެވެ.

ދުނިޔޭގެ ޞިއްޙަތު ދުވަސް ފާހަގަކުރުމުގެގޮތުން އިސްލާމީ މަރުކަޒްގައި ރޭ ބޭއްވި ޚާއްސަ ޖަލްސާގައި ހަސަންބެއަށް ހަނދާނީ ފިލާ ލިބިފައިވާއިރު ހަސަންބެ ވަނީ ސިއްހީ ދާއިރާގައި 44 އަހަރާއި 2 މަހާއި 22 ދުވަސް ހޭދަކޮށްފައިއެވެ.

އުމުރުން 73 އަހަރުގެ ސެންޓަރުހަސަންބެ އަކީ 1960 ވަނަ އަހަރު ސިއްހީ ދާއިރާއާ ގުޅިވަޑައިގަނެ 2008 އަހަރާ ހަމައަށް މެދުކެނޑުމެއް ނެތި ސިއްހާ ދާއިރާގައި މަސައްކަތް ކުރައްވާ އެ ދާއިރާއިން ގިނަބައެއްގެ ލޯބި ހޯއްދަވާފައިވާ ފަރާތެކެވެ. އެންމެ ފުރަތަމަ ހެލްތު އެސިސްޓެންޓެއްގެ ގޮތުން މަސައްކަތް ކުރަން ފެއްޓެވި ހަސަންބެއަށް 65 އަހަރުވެ ވަޒީފާއިން ރިޓަޔަރ ކުރެއްވުމާ ހަމައަށް ތަފާތު މަޤާމުތައް ވަނީ ފުރުއްވާފައެވެ.

އެގޮތުން ސީނިއާ ހެލްތު އެސިސްޓެންޓާއި، ސުޕަރ ހެލްތު އެސިސްޓެންޓާއި، ޕަބްލިކް ހެލްތު އޮފިސަރުގެ އިތުރުން ސީނިޔާ ހެލްތު އޮފިސަރު ފާހަގަ ކޮށްލެވެއެވެ.

ރޭގެ ޖަލްސާގައި ޞިއްޙީ ދާއިރާއަށް ދިގުމުއްދަތަކަށް ޚިދުމަތް ކުރެއްވި 17 ބޭފުޅެއްގެ އަގުވަޒަން ކޮށް ހަނދާނީ ފިލާ ހަވާލުކޮށްދެއްވީ ހެލްތު މިނިސްޓަރު އިރުތިޝާމް އާދަމްއެވެ.