ސްޓޭޑިއަމަށް ހަދިޔާކުރި ވިނަކޮށާ ދަތި, ހިތްހަމަނުޖެހިގެން އަތުލިކަމަށް ދެކެވޭ ވާހަކަ އިބުރާހިމް ދޮގުކޮށްފި

ކައުންސިލަރުކަން ލިބުމުން ވައުދެއް ގޮތަށް ކުޅުދުއްފުށީގައި ހުންނަ ޒޯން ސްޓޭޑިއަމް ހަދިޔާކުރި ވިނަކޮށާ ދަތި ހިތްހަމަނުޖެހިގެން އަތުލިކަމަށް ދެކެވޭ ވާހަކަ ކައުންސިލަރު އިބުރާހިމް އައްބާސް ދޮގުކުރައްވައިފި އެވެ.

“ކުޅުދުއްފުށި އޮންލައިނަށް” ކުރި ސުވާލަކަށް ޖަވާބުދެއްވަމުން އިބުރާހިމް އައްބާސް ވިދާޅުވީ ކައުންސިލަރުކަން ލިބިގެން ސްޓޭޑިއަމްއަށް ހަދިޔާކުރި ދައްޗަކީ އެތަނުގައި ވިނަކޮށާ ދައްޗެއް ނެތުމުން އެތަނަން ދައްޗެއް ލިބެންދެން ބޭނުން ކުރުމަށް ދިން ދައްޗެއް ކަމަށެވެ.

އަދި އޭރުވެސް އެދަތި ހަދިޔާކުރީ ހަމައެކަނި ސްޓޭޑިއަމްގެ ބޭނުންތައް ކުރުމަށް ނޫން ކަމަށާއި ކުޅުދުއްފުށީގައި ހުރި އެހެން ދަނޑުތަކުންވެސް އެދިއްޖެ ހާލަތެއް އެބަޔަކަށްވެސް ބޭނުންކުރެވޭނެ ގޮތަށް ކަމަށް އިބުރާހިމް ވިދާޅުވި އެވެ.

އިބުރާހިމް އައްބާސް ވާހަކަ މިހެން ހުންނެވިއިރު އެކަމުގައި މިނޫހަށް މައުލޫމާތު ދިން އެހެން ފަރާތްތަކުގެ ބަސްމަގު ހުރީ މުޅިން ތަފާތުކޮށެވެ.

ކައުންސިލަރުކަން ލިބުމުން އިބުރާހިމް އައްބާސް ސްޓޭޑިއަމްއަށް ދިނުމަށް ވައުދުވެގެން ހަދިޔާކުރި ވިނަކޮށާ ދަތި ، ޔޫތް މިނިސްޓްރީ އާއި އިބުރާހިމް އައްބާސްއާ ދެމެދު ޖެހުނު މައްސަލައެއްގައި އެކަމާ ހިތްހަމަ ނުޖެހިގެން އަތުލީކަމަށް މިނޫހާ ވާހަކަ ދެއްކި މީހަކު ބުންޏެވެ.

އަދި އެދަތި އޭނާ ނިސްބަތްވާ ސަރަހައްދުގެ ދަނޑެއް ބަލަހައްޓާ ބަޔަކަށް ހަދިޔާކޮށްފައިވާ ކަމަށް އެމީހާ ބުންޏެވެ.

އިބުރާހިމް އައްބާސް ބުނީ އޭނާގެ މަސައްކަތުން ޔޫތް މިނިސްޓްރީން، ވިނަކޮށާ 2 ދަތި މިހާރު ހޯދައިދީފައިވާނެ ކަމަށާއި އެހެން ކުރިން ބޭނުންކުރަމުން ދިޔަ ވިނަކޮށާ ދަތި ކުޅުދުއްފުށީގައި ފުޓްބޯޅަ ދަނޑެއް ބަލަހައްޓަމުންދާ ވިނަކޮށާ ދައްޗެއް ނެތް ބަޔަކަށް ހަދިޔާކޮށްފައިވާނެ ކަމަށެވެ.