ގްރިޒްމަންގެ ދެ ލަނޑުން ބާސެލޯނާ ކެޓިއިރު، ބަޔާންވެސް ސެމީއަށް

ރޭ ޗެމްޕިއަންސް ލީގުގެ ކުއާޓަރ ފައިނަލްގެ ފަހު ލެގުގެ ދެ މެޗު ކުޅުނުއިރު ބާސެލޯނާ އާއި ބެންފީކާ މުބާރާތުން ކަޓައިފި އެވެ.

ރޭ އެތުލެޓިކޯގެ އަމިއްލަ ދަނޑުގައި ބާސެލޯނާ 2-0 އިން ބަލިކޮށްފައިވާއިރު ބެންފީކާ އާއި ބަޔާން ކުޅުނު މެޗު ނިމުނީ 2-2 އިން އެއްވަރުވެގެންނެވެ. އެތުލެޓިކޯ އަދި ބަޔާން ވެސް ސެމީއަށް ދަތުރުކުރީ 3-2 ގެ އެގްރިގޭޓް ސްކޯރ އަކުން މެޗު ކާމިޔާބުކޮށްގެންނެވެ.

އެތުލެޓިކޯއިން ރޭގެ މެޗުގެ ލީޑު ނަގައިފައި ވަނީ 36 ވަނަ މިނެޓްގައި ސައުލް ނިގުއޭޒް ނަގައިދިން ހުރަހަކުން އެންޓޮއިން ގްރިޒްމަން ބޮލުން ޖަހައި ވައްދާލި ލަނޑުންނެވެ. އޭނާ ޖެހި ދެވަނަ ލަނޑަކީ މެޗުގެ 88 ވަނަ މިނެޓްގައި ލިބުނު ޕެނަލްޓީއަކުން ކާމިޔާބުކުރި ލަނޑެކެވެ.

ރޭ ކުޅުނު އަނެއް މެޗުގައި ބެންފީކާއިން 27 ވަނަ މިނެޓްގައި ޕައުލް ޖިމެނޭޒް ޖަހައިދިން ލަނޑުން ލީޑު ހޯދާ އެގްރިގޭޓް ސްކޯ 1-1 އަށް ހަދައިފައި ވީ ނަަމަވެސް ބަޔާންގެ ވިޑާލް ވަނީ ފުރަތަމަ ހާފް ނިމުމުގެ ކުރިން ލަނޑެއް ޖަހައި ރޭގެ މެޗުގެ ނަތީޖާ 1-1 އަށް ބަދަލުކޮށްލާފަ އެވެ.

ފަހު ހާފު ފަށައިގެން މާ ގިނައިރުތަކެއް ނުވެ ތޯމާސް މުލާ ލަނޑެއް ޖަހައި ލީޑު ހޯދައިދީފައިވެ އެވެ. އިތުރު ތިން ލަނޑު ޖަަހައިގެން ސެމީގެ ޖާގައެއް ލިބެން އޮތް ބެންފީކާއަށް ރޭގެ މެޗުގެ 76 ވަނަ މިނެޓްގައި ނަތީޖާ ހަމަހަމަ ކުރެވުނު ނަމަވެސް އިތުރު ލަނޑެއް ކާމިޔާބުކުރެވޭ ގޮތް ވަނީ ނުވެފަ އެވެ.

ސެމީ ފައިނަލްގެ ގުރުއަތުލުން އަންނަ ހުކުރު ދުވަހު އޮންނައިރު ސެމީގެ ފުރަތަމަ ލެގު ކުޅޭނީ އޭޕްރިލް 26 އަދި 27 ގަ އެވެ. ދެވަނަ ލެގު މޭ 3 އަދި 4 ގައި ކުޅޭއިރު މުބާރާތުގެ ފައިނަލް އޮންނާނީ 28 މޭ ގައި މިލާން ގަ އެވެ.