ލަތީފް ބޭއްވި ގުރުއާން އަދި ފުޓްބޯޅަ މުބާރާތުގެ ފައިސާ ހަވާލުކޮށްދިނުމަށް އެމްޑީޕީ ދިއްދޫ ދާއިރާއިން ގޮވާލައިފި

ހއ ދިއްދޫ ދާއިރާގެ މަޖިލިސް މެމްބަރު އަބްދުލް ލަތީފް މުހައްމަދާއި މޯލްޑިވެސް ބްރޯޑްކާސްޓިން ކޮމިޝަނުގެ ރައީސް މުހައްމަދު ޝަހީބު 2015 ވަނަ އަހަރު ދިއްދޫގައި ބޭއްވި ގުރުއާން މުބާރާތާއި ފުޓްބޯޅަ މުބާރާތުގައި ވަނަ ވަނައަށް ދިޔަ ފަރާތްތަކަށް ފައިސާގެ އިނާމު ހަވާލުކޮށްފައި ނުވާ ކަމަށް ބުނެ އެކަން ކުށްވެރިކޮށް ފައިސާ އަވަހަށް ހަވާލު ކުރުމަށް އެމްޑީޕީ ދިއްދޫ ދާއިރާއިން ގޮވާލައިފިއެވެ.

މިދިޔަ ރަމަޟާން މަހުގެ 17 ވަނަ ދުވަހު ބޭއްވި 2 ލައްކަ ރުފިޔާގެ ގުުރުއާން މުބާރާތުގައި އެއްވަނަ އަދި ދެވަނައަށް ދިޔަ ދެ ދަރިވަރުންނަށް، ކޮންމެ ދަރިވަރަކަށް ވެސް ދޭން ޖެހޭ 1 ލައްކަ ރުފިޔާއާއި އެ މުބާރާތުގައި އެކި އުމުރުފުރާއިން ވަނަ ވަނަ އައި ދަރިވަރުންނަށް ދޭންޖެހޭ ފައިސާގެ އިނާމުތަކާއެކު ޖުމްލަ 5 ލައްކައަށް ވުރެ ގިނަ ރުފިޔާއަށް އިހުމާލު ވެފައިވާ ކަމަށް އެ އޮފީހުން އިއްޔެ ނެރުނު ބަޔާނެއްގައި ބުނެފިއެވެ.

ދިއްދޫ މަޖިލސް މެމްބަރު އަބްދުލް ލަތީފް މުހައްމަދު އަދި ބްރޮޑް ކޮމް ރައީސް މުހައްމަދު ޝަހީބު 1 ލައްކަ ފުޓްބޯޅަ މުބާރާތް ފެށުމުގެ ރަސްމިއްޔާތުގައި

މީގެ އިތުރުން ޕީޕީއެމްއަށް ނިސްބަތްވާ މެމްބަރު ލަތީފް މިދިޔަ އަހަރުގެ ޑިސެމްބަރު މަހުގެ 27 ވަނަ ދުވަހު ބޭއްވި “1 ލައްކަ ކަޕް” ފުޓްބޯޅަ މުބާރާތުގައި ޗެމްޕިއަކަން ހޯދި ޓީމަށާއި ރަނައަޕް ހޯދި ޓީމަށް ރައްދުވާ ފައިސާގެ އިނާމާއި މުބާރާތުގައި އެކިއެކި ވަނަ ވަނައަށް އައި ފަރާތްތަކަށް ލިބެން ޖެހޭ ފައިސާގެ އިނާމު މިއަދާ ހަމައަށްވެސް ހަވާލުކޮށްފައި ނުވާ ކަމަށް އެ ބަޔާނުގައިވެއެވެ.

ބަޔާނުގައި އިތުރަށް ބުނެފައި ވަނީ މުބާރާތުގެ އިންތިޒާމުތަކުގެ ތެރެއިން ހއ އަތޮޅުގޭގެ ކޮޓަރި ކުއްޔަށްވާ 40،000 ރުފިޔާއާއި އެކިއެކި ފަރާތްތަކުން ކްރެޑިޓަށް ހޯދާފައިވާ މުދަލާއި ހިދުމަތްތަކާއި ލައިގެން ޖުމްލަ 4 ލައްކަ ރުފިޔާއަށްވުރެ ގިނަ ރުފިޔާ އަރައި މިއަދާ ހަމައަށްވެސް ފައިސާ ހަވާލު ނުކޮށް ލަސް ކުރުމުގެ ސަބަބުން އެ ދާއިރާއަށް މެދުކެނޑުމެއް ނެތި ޝަކުވާ ލިބެމުންދާ ކަމަށެވެ.

އެހެންކަމުން މި މައްސަލަތަކާ ހުރެ އެ ދާއިރާއިން ނުހަނު ކަންބޮޑުވާ ކަމަށާއި ފައިސާ ހައްގުވާ ފަރާތްތަކަށް ވީހާވެސް އަވަހަށް ފައިސާ ހަވާލުކޮށް ކުރުމަށް ޝަހީބަށާއި އަބްދުލް ލަތީފަށް ވަނީ އިލްތިމާސްކޮށްފައިއެވެ.

މީގެ އިތުރުން އެ ބޭފުޅުންގެ ކިބައިގައި ނެތް ފެންވަރުންނާއި ނުވާ ވަރުން ތަފާތު މުބާރާތްތައް ބާއްވައި އެތައް ބައެއްގެ ވަގުތުުތައް ނަގާ ނުލުމަށް އެމްޑީޕީ ދިއްދޫ ދާއިރާއިން ބުނެއެވެ.