ސްވިމިންގ އެސޯސިއޭޝަނުން އިންތިޒާމުކޮށްގެން މިއަހަރު ބާއްވަން ހަމަޖެހިފައިވާ ގައުމީ ދިގުފެތުމުގެ 13 ވަނަ މުބާރާތް ހއ. ދިއްދޫގައި ބާއްވާގޮތަށް ހަމަޖައްސައިފިއެވެ.
އަންނަ މޭ މަހު 6 އަދި 7 ވަނަ ދުވަހު ބޭއްވުމަށް ހަމަޖެހިފައިވާ މި މުބާރާތް ސްވިމިންގ އެސޯސިއޭޝަންގެ އެގްޒެކެޓިވް ކޮމިޓީން ހަމަޖައްސާފައިވަނީ މާލެ ނޫނީ މާލެ ހިމެނޭ ސަރަހައްދުގައި ބޭއްވުމުގެ ބަދަލުގައި މިއަހަރުން ފެށިގެން ކޮންމެވެސް އެއް އަތޮޅެއްގައި ބޭއްވުމަށެވެ.
އެގޮތުން މި މުބާރާތް ދިއްދޫގައި ބޭއްވުމަށް ހަމަޖައްސައި މިހާރު ވަނީ އެކަން ހއ. ދިއްދޫ ކައުންސިލަށާއި ހއ. އަތޮޅު ކައުންސިލަށް އަންގާފަކަމަށާއި އަދި މި މުބާރާތް ބޭއްވުމުގައި ދިއްދޫ ކައުންސިލްގެ ފުރިހަމަ އެހީތެރިކަމާއި އެއްބާރުލުން ލިބިގެންދާނެ ކަމަށް އެ ކައުންސިލުން އަންގާފައި ވާ ކަމަށް ސްވިމިންގ އެސޯސިއޭޝަނުން މައުލޫމާތު ދެއެވެ.
ދިއްދޫގައި ބާއްވާ ގައުމީ 13 ވަނަ ދިގުފެތުމުގެ މުބާރާތުގައި އޮންނާނީ 5 ކިލޯ މީޓަރުގެ ދިގުމިނުގެ ރޭހާއި 1 ކިލޯ މީޓަރުގެ ދިގުމިނުގެ ރޭހެވެ. އަދި އުމުރުން 35 އަހަރުން މަތީގެ މީހުންނަށް ހާއްސަކޮށް 1 ކިލޯ މީޓަރުގެ ރޭސް ބޭއްވުމަށްވެސް ވަނީ ހަމަޖެހިފައެވެ. މި މުބާރާތުގައި އަންހެން ފެތުންތެރިންނާއި ފިރިހެން ފެތުންތެރިން ވާދަކުރާނީ ވަކިވަކިންނެވެ.
މި މުބާރާތުގައި ބައިވެރިވާން އެދޭ ފަރާތްތަކުން އެކަމަށް އެދި ސްވިމިން އެސޯސިއޭޝަނުން ދޫކުރާ ފޯމު ފުރިހަމަކޮށް 2016 މޭ 1 ވަނަ ދުވަހުގެ 14:00 ގެ ކުރިން ހުށަހެޅުމުގެ ފުރުސަތު މިހާރު ވަނީ ހުޅުވާލެވިފައެވެ. މި މުބާރާތުގައި ބައިވެރިވުމުގެ އެންމެ ފަހުގެ ތާރީހަކީ 2016 މޭމަހުގެ 1 ވަނަ ދުވަހުގެ 14:00 އެވެ.
މުބާރާތުގެ ގަވައިދާ މުބާރާތުގައި ބައިވެރިވާން އެދޭ ފޯމު ސްވިމިން އެސޯސިއޭޝަންގެ ވެބްސައިޓުން ޑައުންލޯޑް ކުރެވޭނެއެވެ. އޭގެ އިތުރުން ހއ. ދިއްދޫ ކައުންސިލް އިދާރާއިންވެސް މުބާރާތުގެ ގަވައިދާ ފޯމު ލިބެންހުންނާނެއެވެ.
ގައުމީ ދިގުފެތުމުގެ މުބާރާތުން އެކި ވަނަތަކަށްދާ ފެތުންތެރިންނަށް ފައިސާގެ އިނާމާއި މެޑެލް ދިނުމަށް ވަނީ ހަމަޖެހިފައެވެ.
ކުޅުދުއްފުށީގައި ބާއްވާ އަންހެން މަސައްކަތެރިކަމުގައި މައުރަޒު ހުޅުވައިފި
ހަނިމާދޫ އެއާޕޯޓްގައި ސީޕްލޭން ޓާމިނަލެއް ގާއިމްކުރަނީ
ރަޖިސްޓްރީނުކޮށް ހުރި ގޯތިތަކާއި ސާފުނުކުރާ ފަޅު ގޯތިތަކުގެ މައްސަލާގައި ކައުންސިލްގެ ހަރުކަށި އެންގުމެއް
ޑޮލަރު މާރުކުރުމަށް ބަދަލުތަކެއް
