މައިލޯ ކިޑްސް ފުޓްބޯލް ފިއެސްޓާ މެއި މަހު ކުޅުދުއްފުށީގައި

ހދ.އަތޮޅަށް އަމާޒުކޮށްގެން ސޮކަރ ވެޓެރަންސް އެސޯސިއޭޝަން އޮފް މޯލްޑިވްސްއިން ބާއްވާ “މައިލޯ ކިޑްސް ފުޓްބޯލް ފިއެސްޓާ” އަންނަ މެއި މަހު ކުޅުުދުއްފުށީގައި ބޭއްވުމަށް ހަމަޖެހިފައިވާ ކަމަށް އެ އެސޯސިއޭޝަނުން ބުނެފި އެވެ.

އަންނަ މެއި މަހުގެ 19 ން 21 ށް ކުޅުދުއްފުށީގައި ބޭއްވުމަށް ހަމަޖެހިފައިވާ މި މުބާރާތަކީ ހދ އަތޮޅު ހުރިހާ ސްކޫލް މަދަރުސާއަކަށް ބައިވެރިވެވޭ ގޮތަށް ކުރިއަށް ގެންދާ މުބާރާތެކެވެ. މިމުބާރާތުގައި ބައިވެރިވުމުގެ ފުރުސަތު މިމަހު 21 ވަަނަ ދުވަހުގެ ނިޔަލަށް ވަނީ ހުޅުވާލައިފަ އެވެ.

ކުޅުދުއްފުށި އޮންލައިނަށް މައުލޫމާތު ދެމުން އެ ސޮކަރ ވެޓެރަންސް އެސޯސިއޭޝަން އޮފް މޯލްޑިވްސްގެ ރައީސް އަލީ ޝަމީމް ވިދާޅުވީ މުބާރާތުގައި ބައިވެރިވުމަށް އެދޭ ފޯމް ހުރިހާ ސްކޫލަކާއި ހަވާލުކުރުމަށް މިހާރު އަތޮޅު ކައުންސިލާއި ހަވާލުކުރެވި ފައިވާކަމަށެވެ.

މި ފެސްޓިވަލްގައި ބައިވެރިކުރެވެނީ ސްކޫލަކުން ދެ ޓިމެވެ. އެއީ ޕްރީސްކޫލް ކެޓަގަރީ އެލްކޭޖީ އަދި ޔޫކޭޖީ ދަރިވަރުން ހިމެނޭ 18 ދަރިވަރުންގެ 1 ޓީމާއި، ގްރޭޑް 1 އަދި 2 ގެ ދަރިވަރުން ހިމެނޭގޮތަށް 18 ދަރިވަރުންގެ 1 ޓީމެވެ.

މިފެސްޓިވަލްގައި ބައިވެރިވާ ދަރިވަރުންނަށް ޖާޒީ، ސޯޓް އަދި ސްޓާކީން އެ އެސޯސިއޭޝަނުން ފޯރުކޮށްދޭ ގޮތަށް ހަމަޖެހިފައިވާއިރު މިފެސްޓިވަލްގައި ކޮންމެ ޓީމަކަށް މަދުވެގެން 6 މެޗް އަދި ގިނަވެގެން 10 މެޗް ކުޅުމުގެ ފުރުސަތު ލިބޭނެ އެވެ.

މި ފެސްޓިވަލް ނުވަތަ މުބާރާތުގެ ކޮންމެ ކެޓަގަރީއަކުން ޗެމްޕިއަން އަދި ރަނަރަފް ޓީމަށް ޓްރޮފީ އަދި މެޑަލް ދިނުމަށް ހަމަޖެހިފައިވާއިރު، ބައިވެރިވާ ކޮންމެ ކުއްޖަކަށް މެޑަލްއެއް ލިބޭނެ އެވެ