ޖީއެސްޓީ ނުދައްކާ ފަރާތްތަކުގެ ލިސްޓްގައި މިފަހަރުވެސް ކުޅުދުއްފުށީގެ ދެ ވިޔަފާރިއެއް ހިމެނިއްޖެ

މިދިޔަ އަހަރުގެ ހަތަރުވަނަ ކުއާޓަރގެ ޖީއެސްޓީ ނުދައްކާ ފަރާތްތަކުގެ ނަންތައް އާންމުކުރުމުގެ ގޮތުން މޯލްޑިވްސް އިންލެންޑް ރެވެނިއު އިން ނެރެފައިވާ ލިސްޓުގައި ކުޅުދުއްފުށީގެ ދެ ވިޔަފާރިއެއް ހިމެނިއްޖެ އެވެ.

މީރާއިން އާއްމުކޮށްފައިވާ ލިސްޓު މިދިޔަ ހޮނިހިރު ދުވަހު އަޕްޑޭޓް ކޮށްފައިވާއިރު، އެލިސްޓުގައި ވާގޮތުން ކުޅުދުއްފުށީގައި ރަޖިސްޓްރީކޮށްފައިވާ ވިޔަފާރިތަކުގެ ތެރެއިން ޖީއެސްޓީ ނުދައްކާ ވިޔަފާރިތަކަކީ ތިންވަނަ ކުއާޓަރުގައިވެސް ހިމެނުނު ހުރާ ހުސެން އާދަމްގެ ނަންމަތީގައި ރަޖިސްޓަރީކޮށްފައިވާ ތައުޒަން ޕްލަސް ސަޕްލައި އެންޑް ލޮޖިސްޓިކްސް އަދި ޒަމާނީގެ މުހައްމަދު ހަސަން ނަންމަތީގައި ރަޖިސްޓަރީކޮށްފައިވާ ފަތާތަށި ވިލޯ އިންވެސްމެންޓެވެ.

މީގެ އިތުރުން ށ އަތޮޅުން ފޯކައިދޫ، ގޮއެދޫ އަދި ފީވަކުގެ ވިޔަފާރިތައް ހިމެނިފައިވައިރު ހއ ބާރަށާއި ކެލާ އަދި އުތީމުގެ ވިޔަފާރިއެއްވެސް މި ލިސްޓުގައި ވަނީ ހިމެނިފައިއެވެ.

ޖުމްލަ 83 ފަރާތެއް ހިމެނޭ މި ލިސްޓުގަަައި ޓޫރިޒަމް ވިޔަފާރިކުރާ 6 ފަރާތަކާއި އެ ނޫން ދާއިރާތަކުގައި ވިޔަފާރިކުރާ 77 ފަރާތެއް ހިމެނޭ ކަމަށް މީރާއިން ނެރުނު ނޫސްބަޔާނުގައި ބުނެފައި ވެއެވެ.

ޖީ.އެސް.ޓީ ނުދައްކާ ފަރާތްތަކުގެ މައުލޫމާތު ހާމަކުރުމުގެ ކުރިން އެ ފަރާތްތަކަށް އެކި ފަހަރު މަތިން ފޯނުން ގުޅައި، ޓެކްސް ނުދައްކާ ފަރާތްތަކަށް ޤާނޫނުގައި ކަނޑައަޅައިފައިވާ އަދަބުތައް ކިޔައިދެވިފައިވާނެ ކަމަށާއި، އެސް.އެމް.އެސްގެ ޒަރީއާއިންނާއި އެ ތަންތަނަށް ޒިޔާރަތްކޮށްގެން ވެސް އެ ފަރާތްތަކަށް އެ ކަން އެންގުމުގެ މަސައްކަތްކޮށްފައި ވާނެ ކަމަށްވެސް މިރާގެ ބަޔާނުގައި ވެއެވެ. އަދި ލިސްޓުގައިވާ ފަރާތްތަކުގެ ތެރެއިން އެއްވެސް ފަރާތަކުން ޖީ.އެސް.ޓީ ބަޔާން ހުށަހަޅައިފިނަމަ ނުވަތަ ފައިސާ ދައްކައިފިނަމަ އެ ފަދަ ފަރާތެއްގެ ނަން އެ ލިސްޓުން އުނިކުރެވޭނެކަމަށް މީރާއިން ބުނެއެވެ.