ނޭކުރެންދޫ ކައުންސިލުން އެރަށު ސްކޫލްގެ ކްލާސްރޫމްތައް ޑިޖިޓަލް ކުރަނީ

ނޭކުރެންދޫ ކައުންސިލުން އެރަށު ސްކޫލްގެ ކުލާސް ރޫމްތައް ޑިޖިޓަލް ކުރުމަށް ނިންމައިފި އެވެ.

ނޭކުރެންދޫ މަދަރުސާގެ ކިޔަވައިދިނުމުގެ ފެންވަރު ރަނގަޅުކުރުމަށް ކައުންސިލުން ފަށާފައިވާ މަސައްކަތުގެ ދަށުން ނޭކުރެންދޫ މަދަރުސާގެ ކްލާސްރޫމްތައް ޑިޖިޓަލް ކުރުމަށް ނޭކުރެންދޫ ކައުންސިލުން ނިންމައިފައި ވަނީ އެހީދޭ ފަރާތްތަކުން ދޭ އެހީއާއި ކައުންސިލްގެ ބަޖެޓުންނެވެ.

އޭގެ އިތުރުން މަކުނުދޫ ދާއިރާގެ މަޖިލިސް މެމްބަރު އަނާރާ ނައީމް މި ޕްރޮޖެކްޓަށް އެހީތެރިކަން ފޯރުކޮށްދެއްވާނެކަމަށް ވިދާޅުވެފައިވާ ކަމަށް ކައުންސިލުން މައުލޫމާތު ދެއެވެ.

އެގޮތުން މި ޕްރޮޖެކްޓްގެ ދަށުން ނޭކުރެންދޫ މަދަރުސާގެ 11 ކްލާސް ރޫމެއް ޑިޖިޓަލް ކުރުމަށް ވަނީ ހަމަޖެހިފައެވެ.

ކައުންސިލުން މަސައްކަތް ކުރަމުންދަނީ 2016ވަނަ އަހަރުގެ ދެވަނަ ޓާރމްގެ ކިޔެވުން ފެށެންވާއިރަށް މި މަސައްކަތް ނިންމާ ބޭނުންކުރެވޭނެގޮތް ހެދުމަށް ކަމަށާއި ލަފާކުރެވޭ ގޮތުގައި މި ޕްރޮޖެކްޓަށް 2ލައްކަ ފުރިޔާ ހަރަދުވާނެ ކަމަށް ނޭކުރެންދޫ ކައުންސިލުން ބުނެއެވެ.

މީގެ ކުރިންވެސް އެރަށު ކައުންސިލުން އިސްނަގައިގެން ވަނީ ދަރިވަރުންނާއި ބެލެނިވެރިންނަށް ފަސޭހައަކަށް ނޭކުރެންދޫ މަދަރުސާގެ އިރުމަތީ ފަރާތު މަގުގައި ސަންނެޓްޖެހުމުގެ މަސައްކަތްކޮށްފައެވެ.